കൊച്ചി : നടി വിൻസി അലോഷ്യസിന്‍റെ പരാതി തള്ളി നടൻ ഷൈൻ ടോം ചാക്കോ. വിൻസിയുടെ പരാതിയിൽ അടിസ്ഥാനമില്ലെന്നും ഈഗോയുടെ പുറത്ത് വന്ന പരാതിയാണെന്നും വിൻസി കുടുംബ സുഹൃത്താണെന്നും ഷൈൻ. താൻ അപമര്യാദയായി പെരുമാറിയെന്ന് പറയുന്നത് തെറ്റാണെന്നും നടൻ പ്രതികരിച്ചു.
ഇക്കാര്യം സൂത്രവാക്യം സിനിമയുടെ സംവിധായകനോ നിര്‍മ്മാതാവോ ശരിവെയ്ക്കില്ലെന്നും അവരോട് ആവശ്യമെങ്കിൽ വിളിച്ചു ചോദിക്കുവെന്നും ഷൈൻ ടോം ചാക്കോ പോലീസ് ചോദ്യം ചെയ്യവെ പറഞ്ഞു.
സിനിമയുടെ സെറ്റിൽ താൻ രാസലഹരി ഉപയോഗിച്ചിട്ടില്ലെന്നും ഷൈൻ പൊലീസിന് മൊഴി നൽകി.
നേരത്തെ പൊലീസിന് മുന്നിൽ പിടിച്ച് നിൽക്കാനാകാതെ ഷൈൻ ടോം ചാക്കോ കുറ്റസമ്മതം നടത്തിയിരുന്നു. താൻ മെത്താഫിറ്റമിനും കഞ്ചാവും ഉപയോഗിക്കാറുണ്ടെന്ന് സമ്മതിച്ച ഷൈൻ അച്ഛൻ തന്നെ ഡീ അഡിക്ഷൻ സെൻ്ററിൽ ചികിത്സക്കായി എത്തിച്ച കാര്യവും വെളിപ്പെടുത്തി. ആലപ്പുഴയിൽ ഹൈബ്രിഡ് കഞ്ചാവുമായി അറസ്റ്റിലായ ലഹരി കച്ചവടക്കാരി തസ്ലിമയുമായി ബന്ധമുണ്ടെന്നും താരം സ്ഥിരീകരിച്ചു.
