ചണ്ഡീഗഢ് : ജമ്മു കശ്മീരിലെ പഹൽഗാമിലുണ്ടായ ഭീകരാക്രമണവുമായി ബന്ധപ്പെട്ട് സ്ത്രീകൾക്കെതിരെ വിവാദ പ്രസ്താവനയുമായി ഹരിയാന ബിജെപി രാജ്യസഭാ എംപി രാം ചന്ദർ ജാംഗ്ര. പഹൽഗാമിൽ സ്ത്രീകൾ തീവ്രവാദികളോട് പോരാടണമായിരുന്നുവെനാണ് ബിജെപി എംപിയുടെ വാദം. സ്ത്രീകൾ കൈകൾ കൂപ്പി നിൽക്കുന്നതിനു പകരം പോരാടിയിരുന്നെങ്കിൽ മരണസംഖ്യ കുറയ്ക്കാമായിരുന്നുവെന്ന് അദ്ദേഹം പറയുന്നു. ദേവി അഹല്യഭായ് ഹോൾക്കറുടെ ജന്മവാർഷികത്തിൽ ഭിവാനിയിൽ സംഘടിപ്പിച്ച ഒരു പരിപാടിയിലായിരുന്നു എംപിയുടെ വിവാദ പ്രസ്താവന.
വേദിയിൽ എംഎൽഎമാരായ കപൂർ ബാൽമികി, ഘനശ്യാം സറഫ്, ജില്ലാ മേധാവി വീരേന്ദ്ര കൗശിക് എന്നിവരേയും നൂറുകണക്കിന് തൊഴിലാളികളേയും സാക്ഷിനിർത്തിയായിരുന്നു ഹരിയാന ബിജെപി രാജ്യസഭാ എംപി രാം ചന്ദർ ജാംഗ്രയുടെ പഹൽഗാം ഭീകരാക്രമണത്തിൽ ഭർത്താക്കന്മാരെ നഷ്ടപ്പെട്ട സ്ത്രീകൾക്കെതിരെയുള്ള പരാമർശം. . സെമിനാറിനുശേഷം, പഹൽഗാം ഭീകരാക്രമണത്തിലെ പ്രതികളെ തിരിച്ചറിയുന്നതിനെക്കുറിച്ചും അറസ്റ്റ് ചെയ്യുന്നതിനെക്കുറിച്ചുമുള്ള ചോദ്യത്തിൽ നിന്ന് രാമചന്ദ്ര ജാംഗ്ര ഒഴിഞ്ഞുമാറി. പ്രതികളെ പിടികൂടാനായില്ലെങ്കിലും, നമ്മുടെ സൈന്യം അവരുടെ ഒളിത്താവളങ്ങളും യജമാനന്മാരേയും നശിപ്പിച്ചിട്ടുണ്ടെന്ന് അദ്ദേഹം പറഞ്ഞു. ജംഗ്രയുടെ പരാമർശങ്ങൾ രൂക്ഷമായ വിമർശനത്തിന് ഇടയാക്കിയിട്ടുണ്ട്. റോഹ്തക്കിൽ നിന്നുള്ള കോൺഗ്രസ് എംപി ദീപേന്ദർ സിംഗ് ഹൂഡ, രാമചന്ദ്ര ജംഗ്രയുടെ പരാമർശങ്ങളെ ശക്തമായി അപലപിച്ചു.
“പഹൽഗാം ഭീകരാക്രമണത്തിൽ ഭർത്താക്കന്മാരെ നഷ്ടപ്പെട്ട സ്ത്രീകളുടെ അന്തസ്സ് ഹരിയാനയിൽ നിന്നുള്ള ഈ ബിജെപി എംപി രാമചന്ദ്ര ജി കവർന്നെടുക്കുകയാണ്. ഇത് ലജ്ജാകരവും അപമാനകരവുമായ ഒരു പ്രസ്താവനയാണ്. രക്തസാക്ഷികളുടെ കുടുംബങ്ങളെ ബിജെപി അപമാനിക്കുന്നത് തുടരുന്നു, അത് അവസാനിപ്പിക്കണം.” ഹൂഡ പറഞ്ഞു.
രാമചന്ദ്ര ജംഗ്രയുടെ പരാമർശങ്ങളെ സമാജ്‌വാദി പാർട്ടി മേധാവി അഖിലേഷ് യാദവും ശക്തമായ ഭാഷയിൽ അപലപിച്ചു. അങ്ങേയറ്റം കുറ്റകരവും അസ്വീകാര്യവുമാണ് ജംഗ്രയുടെ ഭാഷയെന്ന് അഖിലേഷ് വിശേഷിപ്പിച്ചു.
