ന്യൂഡൽഹി: രാജ്യത്ത് പുതിയ ക്രിമിനൽ നിയമങ്ങൾ പ്രാബല്യത്തിൽ. ഐ.പി.സി., സി.ആർ.പി.സി., ഇന്ത്യൻ എവിഡൻസ് ആക്ട് എന്നിവ ചരിത്രമായി. ബ്രിട്ടീഷ് ഭരണകാലത്ത് നിലവിൽ വന്ന ഐപിസി(1860), എവിഡൻസ് ആക്ട്(1872) എന്നിവയ്ക്ക് പകരം ഭാരതീയ ന്യായ സംഹിതയും ഭാരതീയ സാക്ഷ്യ അധീനിയവും നിലവിൽ വന്നു. 1973-ലെ ക്രിമിനൽ നടപടിച്ചട്ടത്തിന് പകരം ഭാരതീയ നാഗരിക് സുരക്ഷാ സൻഹിത നിലവിൽ വന്നു.
ഇന്ന് അർദ്ധരാത്രി മുതൽ കേസ് രജിസ്റ്റർ ചെയ്യുന്നതും തുടർനടപടികൾ സ്വീകരിക്കുന്നതും പുതിയ നിയമ പ്രകാരമാണ്. എന്നാൽ നേരത്തെ രജിസ്റ്റർ ചെയ്തിട്ടുള്ള കേസുകളിൽ പഴയ നിയമപ്രകാരം തന്നെയാണ് നടപടികൾ പൂർത്തിയാക്കുക. കഴിഞ്ഞവർഷം ഓഗസ്റ്റ് 12-നാണ് ആഭ്യന്തരമന്ത്രി അമിത് ഷാ പാർലമെന്റിൽ നിയമത്തിന്റെ കരട് അവതരിപ്പിച്ചത്. ശേഷം ഡിസംബറിലാണ് ഈ നിയമങ്ങൾ പാർലമെൻ്റ് പാസാക്കിയത്. അതേ മാസം തന്നെ രാഷ്ട്രപതിയുടെ അനുമതി ലഭിച്ചെങ്കിലും, നടപ്പിലാക്കുന്നത് കേന്ദ്ര സർക്കാർ മാറ്റിവച്ചു. ജൂലൈ 1 മുതൽ നിയമങ്ങൾ പ്രാബല്യത്തിൽ വരുമെന്ന് ഫെബ്രുവരി 24-ന് സർക്കാർ അറിയിച്ചിരുന്നു.
നിരവധി പ്രമുഖ നിയമജ്ഞരും സംസ്ഥാന ബാർ കൗൺസിലുകളും ബാർ അസോസിയേഷനുകളും പുതിയ നിയമങ്ങൾക്കെതിരെ പ്രതിഷേധം അറിയിച്ചിരുന്നതാണ്. പുതിയ നിയമങ്ങളുടെ സ്വാധീനത്തെക്കുറിച്ച് നിയമപണ്ഡിതർ ആശങ്കകൾ അറിയിച്ചിരുന്നതുമാണ്. 2024 ജൂലൈ 1 വരെ നടന്ന തീർപ്പാക്കാത്ത കേസുകളും കുറ്റകൃത്യങ്ങളും സംബന്ധിച്ച് പഴയ നിയമങ്ങൾ കുറഞ്ഞത് രണ്ടോ മൂന്നോ പതിറ്റാണ്ടെങ്കിലും നിലവിലുണ്ടാകുമെന്നും ചൂണ്ടിക്കാണിക്കപ്പെടുന്നു. അതിനാൽ, ക്രിമിനൽ നീതിന്യായ വ്യവസ്ഥ സമാന്തരമായി പ്രയോഗിക്കാൻ നിർബന്ധിതരാകുമെന്ന ആശങ്കകൾ ഉയർന്നുവരുന്നുണ്ട്. നിയമങ്ങൾ ഒരേസമയം, ആശയക്കുഴപ്പങ്ങൾക്കും പിശകുകൾക്കും കാരണമാകുമെന്നും വ്യക്തമാക്കുന്നു
പോലീസ് കസ്റ്റഡിയുടെ വ്യാപ്തി വർദ്ധിപ്പിക്കുന്ന പുതിയ വ്യവസ്ഥകളെക്കുറിച്ചും ആശങ്കയുണ്ട്.
പുതിയ നിയമത്തെ ചോദ്യം ചെയ്ത് സമർപ്പിച്ച രണ്ട് പൊതുതാൽപര്യ ഹർജികൾ പരിഗണിക്കാൻ സുപ്രീം കോടതി വിസമ്മതിച്ചു. പുതിയ നിയമങ്ങൾ പ്രാബല്യത്തിൽ വരുന്നതിന് മുമ്പ് ഫയൽ ചെയ്തതാണെന്ന് പറഞ്ഞ് ഒരു ഹർജി നിരസിച്ചപ്പോൾ, മറ്റൊന്ന് അത് മോശമായി തയ്യാറാക്കിയതാണെന്ന് പറഞ്ഞ് നിരസിച്ചു.
പുതിയ നിയമങ്ങളെക്കുറിച്ചുള്ള ബാറിൻ്റെ ആശങ്കകൾ കേന്ദ്ര സർക്കാരിനെ അറിയിക്കുമെന്ന് ബാർ കൗൺസിൽ ഓഫ് ഇന്ത്യ കഴിഞ്ഞ ആഴ്‌ച അഭിഭാഷക സമൂഹത്തിന് ഉറപ്പ് നൽകിയിരുന്നു. പുതിയ നിയമങ്ങളെക്കുറിച്ച് പഠിക്കാൻ വിദഗ്ധ സമിതി രൂപീകരിക്കാൻ നിർദ്ദേശിച്ച ബാർ കൗൺസിൽ, അവ നടപ്പാക്കുന്നതിനെതിരെയുള്ള പ്രതിഷേധങ്ങളിൽ നിന്നും പ്രക്ഷോഭങ്ങളിൽ നിന്നും വിട്ടുനിൽക്കാൻ അഭിഭാഷകരോട് അഭ്യർത്ഥിച്ചു.
