ബംഗളൂരു : കർണ്ണാടകയിലെ ഷിരൂരിൽ മണ്ണിടിച്ചിലിൽ കാണാതായ സ്ത്രീയുടെ മൃതദേഹം ഗംഗാവലി നദിയിൽ കണ്ടെത്തി. അതേസമയം കോഴിക്കോട് സ്വദേശി അർജുനും മറ്റ് മൂന്ന് പേർക്കുമായി തിരച്ചിൽ തുടരുന്നു.
മണ്ണിടിച്ചിലിൽ അർജുനെ കാണാതായ ദിവസം രാവിലെ 6 മണിക്ക് പകർത്തിയ സ്ഥലത്തിൻ്റെ ഉപഗ്രഹ ദൃശ്യങ്ങൾ ഇന്ത്യൻ ബഹിരാകാശ ഗവേഷണ സംഘടന (ഐഎസ്ആർഒ) നൽകി. ദൃശ്യങ്ങളിൽ അർജുൻ്റെയോ ലോറിയുടെയോ ഒരു സൂചനയും കാണിച്ചില്ല. ഡീപ് സെർച്ച് ഡിറ്റക്ടർ ഉപയോഗിച്ച് സിഗ്നലുകൾ കണ്ടെത്തിയ സ്ഥലങ്ങളിൽ തിരച്ചിൽ നടത്തിയെങ്കിലും ഫലമുണ്ടായില്ല.
കനത്ത മഴയെ തുടർന്ന് കരകവിഞ്ഞൊഴുകുന്ന നദിയിലേക്ക് മറിഞ്ഞ് അർജുനും ലോറിയും ഒഴുക്കിൽപ്പെട്ടിരിക്കാമെന്ന് സൈന്യം സംശയിക്കുന്നു. ആ വഴിക്കും ഊർജിത തെരച്ചിൽ നടത്തും.
കരയിൽ നിന്ന് 40 മീറ്റർ അകലെ സിഗ്നൽ കണ്ടെത്തിയതിനെ തുടർന്ന് ഗംഗാവലി നദിയിൽ തിരച്ചിൽ ഊർജിതമാക്കി. സ്കൂബാ ഡൈവർമാർ നദിയിലെ മൺകൂനകൾ പരിശോധിക്കും. നാവികസേന രക്ഷാപ്രവർത്തനങ്ങൾക്ക് നേതൃത്വം നൽകും. ഇതിന് ശേഷം പുഴയുടെ അടിത്തട്ടിൽ പരിശോധന നടത്തും
രക്ഷാപ്രവർത്തകരുടെ എണ്ണത്തെ ചൊല്ലി മലയാളി രക്ഷാപ്രവർത്തകരും കർണ്ണാടക പോലീസും തമ്മിലുള്ള തർക്കത്തെ തുടർന്ന് ഏഴാം ദിവസം തിരച്ചിലിന് ചെറിയ തിരിച്ചടി നേരിട്ടു. എന്നാൽ പോലീസ് സൂപ്രണ്ടുമായി നടത്തിയ ചർച്ചയിൽ സംഘർഷത്തിന് അയവ് വന്നു. പിന്നീട് രക്ഷാപ്രവർത്തനം സുഗമമായി തുടർന്നു.
