മുംബൈ : മുംബൈയിലെ എൽടിഎംജി എച്ച് സിയോൺ ആശുപത്രിയിലും വനിതാ ഡോക്ടര്‍ക്കുനേരെ അതിക്രമം. മദ്യലഹരിയിലായിരുന്ന രോഗിയും ബന്ധുക്കളും ചേർന്ന് വനിതാ ഡോക്ടറെ മർദ്ദിച്ചതായി മറ്റ് ഡോക്ടർമാർ പറഞ്ഞു. ഇന്ന് പുലർച്ചെയോടെയാണ് സംഭവം. സംഭവത്തിൽ പൊലീസ് കേസെടുത്തു.
കൊൽക്കത്തയിലെ ആര്‍ജി കര്‍ മെഡിക്കല്‍ കോളേജ് ആശുപത്രിയിൽ വനിതാ ഡോക്ടർ അതിക്രൂരമായി കൊല്ലപ്പെട്ട സംഭവത്തിൽ രാജ്യവ്യാപക പ്രതിഷേധവും സിബിഐ അന്വേഷണവും നടക്കുന്നതിനിടയിലാണ് മുംബൈയിലും വനിതാ ഡോക്ടർക്കെതിരെയുള്ള അതിക്രമം അരങ്ങേറുന്നത്. പുലർച്ചെ 3.30 ന് ഡ്യൂട്ടിയിലായിരിക്കെയാണ് ആക്രമണം ഉണ്ടായത്. രോഗിക്കൊപ്പം മദ്യപിച്ചെത്തിയ ആറംഗ സംഘമാണ് ഡോക്ടറെ ഭീഷണിപ്പെടുത്തുകയും ശാരീരികമായി ഉപദ്രവിക്കാനും ശ്രമിച്ചത്. ശേഷം രോഗിയും അക്രമിസംഘവും ആശുപത്രിയിൽനിന്ന് ഓടിരക്ഷപ്പെടുകയായിരുന്നു. സംഭവം സുരക്ഷാ വീഴ്ചയെയാണ് എടുത്തുകാണിക്കുന്നതെന്ന് സിയോൺ ഹോസ്പിറ്റലിലെ റസിഡൻ്റ് ഡോക്ടർമാരുടെ സംഘടന ആരോപിച്ചു.
