ന്യൂസിലാൻ്റിനുമേൽ ഇന്ത്യൻ വനിതകൾക്ക് ആധിപത്യം ; മൂന്നാം ഏകദിനവും പരമ്പരയും

(Photo Courtesy : BCCI )

അഹമ്മദാബാദ് : സെഞ്ചുറി നേടിയ സ്മൃതി മന്ദാനയുടെയും അര്‍ധസെഞ്ചുറിയുമായി പുറത്താകാതെ നിന്ന ക്യാപ്റ്റന്‍ ഹര്‍മന്‍പ്രീത് കൗറിന്‍റെയും ബാറ്റിംഗ് മികവില്‍ ന്യൂസിലന്‍ഡിനെതിരായ  മൂന്നാം ഏകദിന മത്സരവും  പരമ്പരയും കൈപ്പിടിയിലൊതുക്കി ഇന്ത്യൻ വനിതകൾ. ആദ്യം ബാറ്റ് ചെയ്ത ന്യൂസിലന്‍ഡിനെ 49.5 ഓവറില്‍ 232 റണ്‍സിൽ ഒതുക്കിയ ഇന്ത്യൻ വനിതകൾ മറുപടി ബാറ്റിംഗിൽ 44.2 ഓവറില്‍ നാല് വിക്കറ്റ് നഷ്ടത്തില്‍  ലക്ഷ്യം കണ്ടു. 100 റണ്‍സെടുത്ത സ്മൃതി മന്ദാനയാണ് ഇന്ത്യയുടെ ടോപ് സ്കോറര്‍. ക്യാപ്റ്റൻ ഹര്‍മന്‍പ്രീത് കൗര്‍ 59 റണ്‍സുമായി പുറത്താകാതെ നിന്നു. ട്വൻ്റി20 ലോകകപ്പില്‍ ഇന്ത്യയുടെ സെമി സ്വപ്നങ്ങള്‍ തകര്‍ത്ത കിവീസിനോടുള്ള മധുരപ്രതികാരം കൂടിയായി ഏകദിന പരമ്പരയിലെ ഇന്ത്യൻ വനിതകളുടെ സമ്പൂര്‍ണ ജയം. 

ന്യൂസിലന്‍ഡ് ഉയര്‍‍ത്തിയ 233 റണ്‍സ് വിജയലക്ഷ്യത്തിലേക്ക് ബാറ്റുവീശിയ ഇന്ത്യക്ക് തുടക്കത്തിലെ ഷഫാലി വര്‍മയെ(12) നഷ്ടമായെങ്കിലും രണ്ടാം വിക്കറ്റില്‍ ഒത്തുചേര്‍ന്ന യാസ്തിക ഭാട്ടിയയും(35) സ്മൃതിയും ചേര്‍ന്ന് 76 റണ്‍സ് കൂട്ടുകെട്ട് പടുത്തുയർത്തി. 35 റണ്‍സെടുത്ത യാസ്തിക പുറത്തായപ്പോൾ  ക്യാപ്റ്റന്‍ ഹര്‍മന്‍പ്രീത്‌നെ കൂട്ടുപിടിച്ച് സെഞ്ചുറി തികച്ച് സ്മൃതി മന്ദാന ഇന്ത്യൻ ജയം അനായാസമാക്കി.

122 പന്തില്‍ 100 റണ്‍സെടുത്ത സ്മൃതി സെഞ്ചുറി പൂര്‍ത്തിയാക്കി മടങ്ങിയതിന് പിന്നാലെയെത്തിയ  ജെമീമ റോഡ്രിഗസ് ലക്ഷ്യത്തിലേക്കുള്ള പാതയിൽ ഹര്‍മൻപ്രീത് ന് മികച്ച പിന്തുണ നൽകി. 18 പന്തില്‍ 22 റണ്‍സെടുത്ത ജെമീമയെ വിജയത്തിന് ഒരു റണ്ണകലെ നഷ്ടമായെങ്കിലും സോഫി ഡിവൈനിനെ ബൗണ്ടറി കടത്തിയ ഹര്‍മന്‍പ്രീത് ഇന്ത്യക്ക് വിജയം സമ്മാനിച്ചു.

ടോസ് നേടി ആദ്യം ബാറ്റ് ചെയ്ത ന്യൂസിലന്‍ഡ് നിരയിൽ
ബ്രൂക്ക് ഹാളിഡേ 96 പന്തില്‍ 86 റണ്‍സെടുത്തു.ഹാളിഡേക്ക് പുറമെ ജോര്‍ജിയ പ്ലിമ്മര്‍(39), ഇസബെല്ല ഗേസ്(25), ലിയാ താഹുഹു(24) എന്നിവരും തിളങ്ങിയപ്പോള്‍ ക്യാപ്റ്റന്‍ സോഫി ഡിവൈന്‍ 9 റണ്‍സെടുത്തും സൂസി ബേറ്റ്സ് നാലു റണ്‍സെടുത്തു പുറത്തായി. ഇന്ത്യക്കായി ദീപ്തി ശര്‍മ 39 റണ്‍സിന് മൂന്ന് വിക്കറ്റ് നേടി. പ്രിയ മിശ്ര രണ്ട് വിക്കറ്റ് വീഴ്ത്തി.

Indian women dominate New Zealand; 3rd ODI and series