പാലക്കാട്: പാലക്കാട് ഉപതിരഞ്ഞെടുപ്പിന്റെ വോട്ടെടുപ്പ് അവസാനിപ്പോൾ പോളിങ് 70 ശതമാനം കടന്നു. ഒടുവിലത്തെ റിപ്പോര്‍ട്ട് അനുസരിച്ച് പാലക്കാട് നഗരസഭയിലാണ് ഏറ്റവും കൂടുതല്‍ പോളിങ്. കണ്ണാടി ഗ്രാമ പഞ്ചായത്തിൽ ഏറ്റവും കുറവും. കഴിഞ്ഞ തവണത്തെ 74 ശതമാനത്തോട് അടുത്തെത്തിയില്ലെങ്കിലും ഇത്തവണ പോളിങ് തെരഞ്ഞെടുപ്പ് കമ്മീഷൻ്റെ കണക്കുകൾ പുറത്തുവരുമ്പോൾ അൽപ്പം കൂടി ഉയരാൻ സാദ്ധ്യതയുണ്ട്. യുഡിഎഫ്, എൽ ഡിഎഫ്, എന്‍ഡിഎ സ്ഥാനാര്‍ത്ഥികള്‍ ഉള്‍പ്പെടെ 10 സ്ഥാനാര്‍ത്ഥികളാണ് മത്സര രംഗത്തുള്ളത്.
രാവിലെ പല സ്ഥലത്തും മെഷീനുകള്‍ തകരാറായതിനാല്‍ വോട്ടിങ് വൈകി. ഉച്ചകഴിഞ്ഞാണ് പോളിങ് വേഗത്തിലായത്. ഇതിനിടയില്‍ വോട്ടിങ് മനഃപ്പൂര്‍വം വൈകിപ്പിക്കുകയാണെന്ന ആരോപണവുമായി ബിജെപി രംഗത്തെത്തിയിരുന്നു.
ഇരട്ട വോട്ടിന്റെ പേരില്‍ വിവാദത്തിലായ ബി.ജെ.പി ജില്ല പ്രസിഡന്റ് കെ.എം. ഹരിദാസിന് വോട്ട് ചെയ്യാനായില്ല. ഹരിദാസ് വോട്ട് ചെയ്യാൻ എത്തിയപ്പോഴേക്കും ഗേറ്റ് അടച്ചിരുന്നു. ഹരിദാസ് വോട്ട് ചെയ്യാനെത്തുമെങ്കില്‍ തടയാനായി വി.കെ ശ്രീകണ്ഠന്‍ എം.പിയുടെ നേതൃത്വത്തിൽ കോണ്‍ഗ്രസ് പ്രവര്‍ത്തകര്‍ ബൂത്തില്‍ സംഘടിച്ചിരുന്നു.
വിജയപ്രതീക്ഷയിലാണ് മൂന്ന് മുന്നണികളും. 23 ന് ആണ് പോടെണ്ണൽ. പാലക്കാടിന് പുറമെ ചേലക്കര നിയമസഭാ മണ്ഡലത്തിലേയും വയനാട് ലോകസഭാ മണ്ഡലത്തിലേയും വോട്ടെണ്ണലും അന്ന് നടക്കും.
