മുംബൈ: ബാബ സിദ്ദിഖി വധക്കേസുമായി ബന്ധപ്പെട്ട് പ്രതികൾക്ക് സാമ്പത്തിക സഹായം നൽകിയ ആൾ അറസ്റ്റിൽ. വെള്ളിയാഴ്ച നാഗ്പൂരിൽ നിന്നാണ് പനജ് സ്വദേശി സുമിത് ദിനകർ വാഗ് എന്ന 26കാരനെ മഹാരാഷ്ട്ര പൊലീസ് അറസ്റ്റ് ചെയ്തത്. കേസുമായി ബന്ധപ്പെട്ട് നടക്കുന്ന 26 -ാമത്തെ അറസ്റ്റാണിത്.
കേസിൽ നേരത്തെ അറസ്റ്റിലായ പ്രതി ഗുർനൈൽ സിങ്ങിന്റെ സഹോദരൻ നരേഷ്കുമാർ സിങ്ങിനും രൂപേഷ് മൊഹോൾ, ഹരീഷ്കുമാർ എന്നിവരുൾപ്പെടെയുള്ള മറ്റ് പ്രതികൾക്കും പണം കൈമാറിയത് സുമിത് ദിനകർ വാഗ് ആണെന്നാണ് അന്വേഷണ സംഘത്തിൻ്റെ കണ്ടെത്തൽ. അറസ്റ്റിലായ മറ്റൊരു പ്രതിയായ സൽമാൻ വോറയുടെ പേരിൽ റജിസ്റ്റർ ചെയ്ത പുതിയ സിം കാർഡ് ഉപയോഗിച്ചാണ് ഇന്റർനെറ്റ് ബാങ്കിങ് വഴി ഇയാൾ ഇടപാടുകൾ നടത്തിയിരുന്നത്.
നവംബർ 10ന് ഉത്തർപ്രദേശിലെ ബഹ്‌റൈച്ച് ജില്ലയിൽ നിന്ന് ഷൂട്ടർ ശിവകുമാർ ഗൗതമിനെ അറസ്റ്റ് ചെയ്യാനായതാണ് അന്വേഷണത്തിന് വഴിത്തിരിവായത്. ഒക്ടോബർ 12 മുതൽ ഒളിവിലായിരുന്ന ഗൗതം നേപ്പാളിലേക്ക് കടക്കാൻ ശ്രമിക്കവെയാണ് പിടിയിലാവുന്നത്. അന്വേഷണത്തിൽ ബാന്ദ്ര ഈസ്റ്റിൽ വെടിവയ്പ്പ് നടന്ന സ്ഥലം ശിവകുമാർ ഗൗതം സന്ദർശിച്ചതായും പിന്നീട് സിദ്ദിഖിന്റെ മരണം സ്ഥിരീകരിക്കാൻ ബാന്ദ്ര വെസ്റ്റിലെ ലീലാവതി ആശുപത്രിയിലേക്ക് ഇയാൾ പോയതായും കണ്ടെത്തിയിട്ടുണ്ട്.
എൻസിപി നേതാവ് ബാബ സിദ്ദിഖി (66) ഒക്ടോബർ 12 – നാണ് വെടിയേറ്റ് മരിച്ചത്. മകന്റെ ഓഫീസിൽ നിന്ന് ഇറങ്ങി കാറിൽ കയറാൻ ശ്രമിക്കവെയാണ് അക്രമികൾ വെടിയുതിർത്തത്.
സംഭവത്തിൽ പിടിയിലായവർ തങ്ങൾ ലോറൻസ് ബിഷ്‌ണോയിയുടെ സംഘത്തിലുള്ളവരാണെന്ന് പൊലീസിനോട് പറഞ്ഞിരുന്നു. ആ വഴിക്കുള്ള അന്വേഷണം തുടരുന്നതിനിടയിലാണ് പ്രതികൾക്ക് സാമ്പത്തിക സഹായം നൽകിയ ആളെ അറസ്റ്റ് ചെയ്യുന്നത്.
