ന്യൂഡൽഹി : സ്ഥാനഭ്രഷ്ടയാക്കപ്പെട്ട പ്രധാനമന്ത്രി ഷെയ്ഖ് ഹസീനയെ ബംഗ്ലാദേശിലേക്ക് തിരിച്ചയക്കണമെന്നാവശ്യപ്പെട്ട് മുഹമ്മദ് യൂനസിൻ്റെ നേതൃത്വത്തിലുള്ള ഇടക്കാല ബംഗ്ലാദേശ് സർക്കാരിൻ്റെ ഔദ്യോഗിക അഭ്യർത്ഥന ലഭിച്ചതായി ഇന്ത്യ തിങ്കളാഴ്ച സ്ഥിരീകരിച്ചു. എന്നാൽ, നിലവിൽ ഈ വിഷയത്തിൽ ഇന്ത്യ അഭിപ്രായമൊന്നും പറയുന്നില്ലെന്ന് വിദേശകാര്യ മന്ത്രാലയ (എംഇഎ) വക്താവ് രൺധീർ ജയ്‌സ്വാൾ വ്യക്തമാക്കി.
“കൈമാറൽ അഭ്യർത്ഥനയുമായി ബന്ധപ്പെട്ട് ബംഗ്ലാദേശ് ഹൈക്കമ്മീഷനിൽ നിന്ന് ഇന്ന് ഒരു കുറിപ്പ് ലഭിച്ചതായി സ്ഥിരീകരിക്കുന്നു. നിലവിൽ, ഈ വിഷയത്തിൽ അഭിപ്രായമൊന്നും പറയുന്നില്ല,” MEA വക്താവ് രൺധീർ ജയ്‌സ്വാൾ ഒരു മാധ്യമ സമ്മേളനത്തിൽ പറഞ്ഞു.
16 വർഷത്തെ ഭരണത്തെ അട്ടിമറിച്ച വിദ്യാർത്ഥി പ്രക്ഷോഭത്തിനിടയിൽ രാജ്യം വിട്ട 77 കാരിയായ ഷെയ്ഖ് ഹസീന ആഗസ്റ്റ് 5 മുതൽ ഇന്ത്യയിൽ പ്രവാസ ജീവിതം നയിക്കുകയാണ്. ധാക്ക ആസ്ഥാനമായുള്ള ഇൻ്റർനാഷണൽ ക്രൈം ട്രിബ്യൂണൽ (ഐസിടി) ഷെയ്ഖ് ഹസീനയ്ക്കും നിരവധി മുൻ കാബിനറ്റ് മന്ത്രിമാർക്കും ഉപദേഷ്ടാക്കൾക്കും സൈനിക, സിവിൽ ഉദ്യോഗസ്ഥർക്കും മനുഷ്യത്വത്തിനും വംശഹത്യക്കും എതിരായ കുറ്റകൃത്യങ്ങൾക്ക് അറസ്റ്റ് വാറണ്ട് പുറപ്പെടുവെച്ചിട്ടുണ്ട്. ഈ ജുഡീഷ്യൽ നടപടിക്രമങ്ങൾക്കായാണ് ഷെയ്ഖ് ഹസീനയെ തിരിച്ചയക്കണമെന്ന് ബംഗ്ലാദേശ് വിദേശകാര്യ മന്ത്രി തൗഹിദ് ഹുസൈൻ ഇന്ത്യൻ സർക്കാരിനോട് ആവശ്യപ്പെട്ട് സന്ദേശമയച്ചിട്ടുള്ളത്.
