തിരുവനന്തപുരം : ശ്രീ പത്മനാഭസ്വാമി ക്ഷേത്രത്തിലെ ലേലത്തില്‍ ക്രമക്കേട്. ഭക്തര്‍ സമര്‍പ്പിച്ച സാരികള്‍ ലേലവിലയിടാതെയാണ് വില്‍പ്പന നടത്തിയതെന്നാണ് കണ്ടെത്തൽ. ഓഡിറ്റര്‍ നടത്തിയ പരിശോധനയിലാണ് ക്രമക്കേട് പുറത്ത് വന്നത്.
ഭക്തര്‍ സമര്‍പ്പിച്ച സാരി, മുണ്ട് എന്നിവ ക്ഷേത്രത്തില്‍ ഞായര്‍, വ്യാഴം ദിവസങ്ങളില്‍ ലേലത്തിന് വെയ്ക്കാറുണ്ട്. ഇവയ്ക്ക് അടിസ്ഥാന വില നിശ്ചയിച്ചാണ് വില്‍പ്പന നടത്തേണ്ടത്. എന്നാല്‍ രശീതി പരിശോധിച്ചപ്പോള്‍ ഇതൊന്നും പാലിച്ചിട്ടില്ലെന്ന് തെളിഞ്ഞു. ‘തുടർന്ന് നടത്തിയ വിശദ പരിശോധനയിൽ ഇതുമായി ബന്ധപ്പെട്ട നിരവധി ക്രമക്കേടുകളാണ് പുറത്തു വന്നത്.
‘ലേലത്തിൽ ക്രമക്കേട് കണ്ടെത്തിയ സാഹചര്യത്തില്‍ ഭരണസമിതി ചേർന്ന് രണ്ട് പേരെ സസ്‌പെന്‍ഡ് ചെയ്തു. സംഭവത്തില്‍ തുടരന്വേഷണം നടത്തി നടപടിയുമായി മുന്നോട്ട് പോവാനാണ് ദേവസ്വം തീരുമാനം.
