തിരുവനന്തപുരം: വയനാട് പുനരധിവാസത്തിനായി പ്രഖ്യാപിക്കപ്പെട്ട സാലറി ചലഞ്ചിൽ നിന്ന് മാറി അതിനപ്പുറം പ്രത്യേക ധനസഹായം നൽകാനുള്ള നീക്കവുമായി ഐ.എ.എസ് അസോസിയേഷൻ. ഇതിനെ തുടർന്ന് സാലറി ചലഞ്ചിനായി ആഗസ്റ്റ് മാസത്തെ വിഹിതം പിടിക്കരുതെന്ന് ആവശ്യപ്പെട്ട് ഐ.എ.എസ് അസോസിയേഷൻ പ്രസിഡന്റ് ബി. അശോക് ധന സെക്രട്ടറിക്കു കത്ത് നൽകി. സാലറി ചലഞ്ചിനപ്പുറം അംഗങ്ങൾ ഓരോരുത്തരും 50,000 രൂപ വീതം നൽകണമെന്ന് അസോസിയേഷൻ നേതൃത്വത്തിന് അഭിപ്രായമുണ്ട്.
അതേസമയം, ഇക്കാര്യത്തിൽ അംഗങ്ങളുടെ നിലപാട് അറിയാനോ അഭിപ്രായ സമന്വയമുണ്ടാക്കാനോ സമയപരിമിതി മൂലം യോഗവും ചേരാനുമായിട്ടില്ല. ആഗസ്റ്റ് മാസത്തെ ശമ്പളത്തിൽനിന്ന് അഞ്ചു ദിവസത്തെ ശമ്പളവിഹിതം പിടിച്ച് തുടങ്ങിയാൽ പിന്നെ 50,000 രൂപ വീതം നൽകുന്ന പദ്ധതിക്ക് അത് തടസ്സമാകും. ഈ സാഹചര്യത്തിൽ അഭിപ്രായ സമന്വയമുണ്ടാക്കുന്നതിനുള്ള സാവകാശത്തിനുവേണ്ടിയാണ് ആഗസ്റ്റ് മാസത്തെ ശമ്പളത്തിൽനിന്ന് പിടിക്കരുതെന്ന് ആവശ്യപ്പെട്ട് ധനസെക്രട്ടറിക്ക് കത്ത് നൽകിയതെന്നും അസോസിയേഷൻ പ്രസിഡന്റ് പറഞ്ഞു. പല ഐ.എ.എസ് ഉദ്യോഗസ്ഥരും ഒരു മാസത്തെ ശമ്പളം വരെ വയനാടിനായി നല്‍കാൻ സന്നദ്ധത അറിയിച്ചിട്ടുമുണ്ട്.
