നീരേറ്റുപുറം (ആലപ്പുഴ): കുവൈറ്റിലെ അബ്ബാസിയ സൈഫ് പാർപ്പിട സമുച്ചയത്തിലുണ്ടായ തീപ്പിടിത്തത്തിൽ നാലംഗ കുടുംബം മരിച്ചു. ആലപ്പുഴ നീരേറ്റുപുറം സ്വദേശി
കളായ മുളയ്ക്കൽ മാത്യൂസ് (40), ഭാര്യ ലിനി എബ്രഹാം (38), മക്കളായ ഐറിന് (14), ഐസക് (9) എന്നിവരാണ് മരിച്ചത്. അവധിക്ക് നാട്ടിൽ പോയ കുടുബം വെള്ളിയാഴ്ച പുലർച്ചെയാണ് കുവൈറ്റിലെ ഫ്ലാറ്റിൽ തിരിച്ചെത്തിയത്.
കുവെത്തിൽ റോയിട്ടേഴ്സ് ജീവനക്കാരനായ മാത്യുവും, നേഴ്സായ ലിനിയും കുട്ടികളുടെ സ്കൂൾ തുറക്കുന്നതിനു മുന്നോടിയായാണ് ഒരു മാസത്തെ അവധി പൂർത്തിയാക്കി മടങ്ങിയത്.
വെള്ളിയാഴ്ച രാത്രി ഒൻപതോടെയായിരുന്നു ഇവർ താമസിച്ചിരുന്നിടത്ത് തീ പടർന്നത്. യാത്രാ ക്ഷീണം കാരണം ഇവർ നേരത്തെ ഉറങ്ങിയിട്ടുണ്ടാവാം എന്നാണ് ധാരണ. എ.സിയിലെ വൈദ്യുതി തകരാറാണ് അപകടകാരണമെന്നാണ് പ്രാഥമിക വിവരം. വിഷപ്പുക ശ്വസിച്ചാണ് മരണമെന്നും സൂചനയുണ്ട്
ഒരു വർഷം മുമ്പായിരുന്നു ഇവരുടെ പുതിയ വീടിന്റെ കൂദാശ. അന്ന് അധികം നാൾ നിൽക്കാൻ കഴിയാഞ്ഞതിൻ്റെ ക്ഷീണം ഇത്തവണത്തെ അവധിക്കു വന്നപ്പോൾ തീർത്താണ് മാത്യുവും കുടുംബവും മടങ്ങിയത്.
അഗ്നിരക്ഷാസേനയും പോലീസും സ്ഥലത്തെത്തിയാണ് തുടർനടപടി സ്വീകരിച്ചത്. അന്വേഷണം ആരംഭിച്ചതായി പോലീസ് അറിയിച്ചു. കുവൈത്തിലെ ഔദ്യോഗിക നടപടിക്രമങ്ങൾ പൂർത്തിയാക്കി മൃതദേഹം വേഗത്തിൽ നാട്ടിലെത്തിക്കുന്നതിന് കുവൈത്തിലെ ഇന്ത്യൻ അംബാസിഡറും കേന്ദ്രമന്ത്രിമാരും ഇടപെടുന്നുണ്ട്.
