തിരുവനന്തപുരം : അന്തരിച്ച മുൻ മുഖ്യമന്ത്രി വി എസ് അച്യുതാനന്ദനോടുള്ള ആദരവിൻ്റെ ഭാഗമായി സംസ്കാര ചടങ്ങുകൾ നടക്കുന്ന ആലപ്പുഴ ജില്ലയിൽ നാളെ അവധി പ്രഖ്യാപിച്ചു. പ്രൊഫഷണൽ കോളേജുകളുൾപ്പെടെയുള്ള വിദ്യാഭ്യാസ സ്ഥാപനങ്ങൾക്കും സർക്കാർ ഓഫീസുകൾക്കും അവധി ബാധകമാണ്. വിവിധ പി എസ് സി പരീക്ഷകളും മാറ്റി.
നാളെ വൈകീട്ട് മൂന്ന് മണിയോടെയാണ് ഔദ്യോഗിക ബഹുമതികളോടെ വി എസിന് കേരളം വിട നൽകുക. പുന്നപ്ര വയലാറിൻ്റെ ഓർമ്മകളുറങ്ങുന്ന വലിയചുടുകാട്ടിലാണ് സംസ്കാരം.
തിരുവനന്തപുരത്ത് നിന്നും ദർബാർ ഹാളിലെ പൊതുദർശനത്തിന് ശേഷം ഉച്ചയ്ക്ക് 2.30 മണിക്ക് വി എസിൻ്റെ ഭൗതികദേഹം വഹിച്ചുള്ള വിലാപയാത്ര ആരംഭിച്ചു. രാത്രിയോടെ ആലപ്പുഴയിൽ എത്തിച്ചേരുമെന്നാണ് പ്രതിക്ഷിച്ചതെങ്കിലും രാത്രി 9.45 ന് ആറ്റിങ്ങലിലേക്ക് എത്തിയതേയുള്ളൂ. വഴിയരികിലെല്ലാം കുട്ടികളും സ്ത്രീകളും വിദ്യാർത്ഥികളും വൃദ്ധരുമായ ആയിരക്കണക്കിന് ആളുകളാണ് വി എസിന് അന്തിമോപചാരമർപ്പിക്കാനായി കാത്തു നിൽക്കുന്നത്.
ആലപ്പുഴ പുന്നപ്ര പറവൂരിലെ വീട്ടിലാണ് ഇന്ന് വിഎസിനെ എത്തിക്കേണ്ടിയിരുന്നത്. എന്നാൽ ബുധനാഴ്ച രാവിലെ 6 മണിയെങ്കിലുമാകും വിലാപയാത്ര പുന്നപ്രയിലെത്താൻ. നാളെ രാവിലെ 9 മുതല്‍ സിപിഎം ജില്ലാ കമ്മിറ്റി ഓഫിസില്‍ വി എസ് അച്യുതാനന്ദന്റെ മൃതദേഹം പൊതു ദര്‍ശനത്തിന് വെക്കും. തുടര്‍ന്ന് രാവിലെ 10 മുതല്‍ ആലപ്പുഴ കടപ്പുറത്തെ പോലീസ് റിക്രിയേഷന്‍ ഗ്രൗണ്ടിലും പൊതുദര്‍ശനമുണ്ടാകും. ഉച്ചകഴിഞ്ഞ് മൂന്നിന് വലിയ ചുടുകാട്ടില്‍ ഔദ്യോഗിക ബഹുമതികളോടെയാണ് സംസ്കാരം.
പിഎസ്‍സി നാളത്തെ പരീക്ഷകൾ മാറ്റി; അഭിമുഖങ്ങള്‍ക്ക് മാറ്റമില്ല
പിഎസ്‍സി നാളെ (2025 ജൂലൈ 23 ബുധനാഴ്ച) നടത്താനിരുന്ന പരീക്ഷകൾ മാറ്റി വെച്ചു. പൊതുമരാമത്ത് / ജലസേചന വകുപ്പുകളിലെ സെക്കന്റ് ഗ്രേഡ് ഓവർസിയർ/ഡ്രാഫ്റ്റ്സ്മാൻ (സിവിൽ )(നേരിട്ടുള്ള നിയമനം -കാറ്റഗറി നമ്പർ 8/2024), ജലസേചന വകുപ്പിലെ സെക്കന്റ് ഗ്രേഡ് ഓവർസിയർ /ഡ്രാഫ്റ്റ്സ്മാൻ (സിവിൽ- പട്ടിക വർഗ്ഗക്കാർക്കു മാത്രം – കാറ്റഗറി നമ്പർ 293/2024), കേരള സംസ്ഥാന പട്ടിക ജാതി/ പട്ടിക വർഗ്ഗ വികസന കോർപ്പറേഷനിലെ ട്രേസർ, (നേരിട്ടുള്ള നിയമനം, കാറ്റഗറി നമ്പർ – 736/2024) തസ്തികകളിലേക്കുള്ള പരീക്ഷകളാണ് മാറ്റിവെച്ചത്. പുതുക്കിയ തീയതി പിന്നീട് അറിയിക്കും. നാളെ നടത്തുവാൻ നിശ്ചയിച്ചിട്ടുള്ള പിഎസ്‍സി അഭിമുഖങ്ങള്‍ക്ക് മാറ്റമില്ല
