മുംബൈ : സംസ്ഥാനത്തുടനീളമുള്ള ഹിന്ദുക്കളുടെ എല്ലാ ജട്ക മട്ടൺ കടകളും പുതുതായി ആരംഭിച്ച മൽഹാർ സർട്ടിഫിക്കറ്റിന് കീഴിൽ രജിസ്റ്റർ ചെയ്യണമെന്ന പ്രഖ്യാപനവുമായി മഹാരാഷ്ട്ര മന്ത്രി നിതേഷ് റാണെ. തിങ്കളാഴ്ച മുതൽ മൽഹാർ സർട്ടിഫിക്കറ്റിനുള്ള രജിസ്ട്രേഷൻ ആരംഭിക്കുമെന്നും അറിയിപ്പുണ്ട്. മൽഹാർ സർട്ടിഫിക്കേഷൻ ഇന്ത്യയിൽ നിലവിലുള്ള ഹലാൽ സർട്ടിഫിക്കേഷന് സമാനമായി ഹിന്ദുക്കളുടെ കടകൾക്ക് മാത്രമായിരിക്കുമെന്നും മന്ത്രി വ്യക്തമാക്കി. ഹലാൽ കടകളിൽ മാംസം ശരിയത്ത് അല്ലെങ്കിൽ ഇസ്ലാമിക നിയമം അനുസരിച്ച് തയ്യാറാക്കുന്നു. ഹലാൽ കശാപ്പ് രീതിക്ക് വിരുദ്ധമായി, വേദനയില്ലാത്ത രീതിയിൽ ഒറ്റ അടികൊണ്ട് മൃഗത്തെ കൊന്നതിന് ശേഷമാണ് മൽഹാർ കടകളിൽ ജട്ട്ക മാംസം തയ്യാറാക്കുന്നത്.
മൽഹാർ സർട്ടിഫിക്കേഷൻ.കോം എന്ന പേരിൽ സമാനമായ ഒരു ജട്ട്ക മാംസ വിതരണ പ്ലാറ്റ്‌ഫോം സൃഷ്ടിക്കുമെന്നും റാണെയുടെ പ്രഖ്യാപനത്തിലുണ്ട്. ഇത് ഖാതിക് സമുദായത്തിലെ ഹിന്ദുക്കൾ മാത്രമായി നടത്തുമെന്ന് അദ്ദേഹം പറഞ്ഞു.
“ഇന്ന് മഹാരാഷ്ട്രയിൽ നിന്ന് ഹിന്ദു സമൂഹത്തിനായി ഒരു സുപ്രധാന ചുവടുവയ്പ്പ് ഞങ്ങൾ നടത്തിയിരിക്കുന്നു. ഹിന്ദു സമൂഹത്തിനുവേണ്ടിയാണ് ഈ ചിന്ത കൊണ്ടുവരുന്നത്. അതിലൂടെ ഹിന്ദുക്കൾക്ക് ജട്ക മട്ടൺ വിൽക്കുന്ന മട്ടൺ കടകളിൽ പ്രവേശനം ലഭിക്കും,” റാണെ പറഞ്ഞു. മൽഹാർ സർട്ടിഫിക്കേഷൻ ഇല്ലാത്ത കടകളിൽ നിന്ന് ആട്ടിറച്ചി വാങ്ങരുതെന്ന് മഹാരാഷ്ട്ര ഫിഷറീസ് മന്ത്രി ഹിന്ദുക്കളോട് പറഞ്ഞു.
“ഈ മൽഹാർ സർട്ടിഫിക്കേഷൻ കൂടുതൽ കൂടുതൽ ഉപയോഗിക്കണം, മൽഹാർ സർട്ടിഫിക്കേഷൻ ഇല്ലാതെ ഹിന്ദുക്കൾ കടകളിൽ നിന്ന് ആട്ടിറച്ചി വാങ്ങരുത്. ഇതാണ് ഞാൻ ജനങ്ങളോട് അഭ്യർത്ഥിക്കുന്നത്. ജയ് ശ്രീ റാം,” റാണെ കൂട്ടിച്ചേർത്തു.
‘മൽഹാർ വെബ്‌സൈറ്റ് സ്വയം വിശേഷിപ്പിക്കുന്നത് “ജട്ട്ക മട്ടൺ, ചിക്കൻ വിൽപ്പനക്കാർക്കുള്ള ഒരു സർട്ടിഫൈഡ് പ്ലാറ്റ്‌ഫോം” എന്നാണ്. ആടിന്റെയോ ചെമ്മരിയാടിന്റെയോ മാംസം തയ്യാറാക്കി “ഹിന്ദു മത പാരമ്പര്യങ്ങൾക്കനുസൃതമായി ബലിയർപ്പിക്കുന്നു” എന്നും വെബ്‌സൈറ്റ് പരാമർശിക്കുന്നു.
“ഈ മാംസം ഹിന്ദു ഖാതിക് കമ്മ്യൂണിറ്റി വിൽപ്പനക്കാർ വഴി മാത്രമേ ലഭ്യമാകൂ. അതിനാൽ, മൽഹാർ സാക്ഷ്യപ്പെടുത്തിയ വിൽപ്പനക്കാരിൽ നിന്ന് മാത്രം ആട്ടിറച്ചി വാങ്ങാൻ ഞങ്ങൾ എല്ലാവരെയും പ്രോത്സാഹിപ്പിക്കുന്നു,” വെബ്‌സൈറ്റ് പറയുന്നു.
മൽഹാർ മാംസം “പുതിയതും, വൃത്തിയുള്ളതും, ഉമിനീർ മലിനീകരണമില്ലാത്തതും, മറ്റ് മൃഗങ്ങളുടെ മാംസവുമായി കലർത്താത്തതുമാണ്” എന്ന് വെബ്‌സൈറ്റ് വിശദീകരിക്കുന്നു.
