[Photo courtesy : BCCI/X]
റാഞ്ചി :റാഞ്ചിയിൽദക്ഷിണാഫ്രിക്കയ്ക്കെതിരായ ആദ്യ ഏകദിനത്തിൽ തൻ്റെ 52-ാം ഏകദിന സെഞ്ച്വറി പൂർത്തിയാക്കി റെക്കോർഡിട്ട് വിരാട് കോഹ്ലി. അന്താരാഷ്ട്ര ക്രിക്കറ്റിന്റെ ഒരു ഫോർമാറ്റിൽ ഏറ്റവും കൂടുതൽ സെഞ്ച്വറികൾ നേടുന്ന ബാറ്റ്സ്മാനായി കോഹ്ലി മാറി. ടെസ്റ്റ് ക്രിക്കറ്റിൽ 51 സെഞ്ച്വറികൾ നേടിയ മുൻ ടീം ഇന്ത്യ ക്യാപ്റ്റൻ മാസ്റ്റർ ബ്ലാസ്റ്റർ സച്ചിൻ ടെണ്ടുൽക്കറുടെ റെക്കോർഡാണ് കോഹ്ലി തകർത്തത്

കോഹ്ലിയുടെ റാഞ്ചിയിലെ മൂന്നാമത്തെ ഏകദിന സെഞ്ച്വറിയാണിത്. 102 പന്തിൽ ഏഴ് ബൗണ്ടറികളും അഞ്ച് സിക്സറുകളും സഹിതം മുന്നേറിയ കോഹ്ലി, 38-ാം ഓവറിൽ മാർക്കോ ജാൻസന്റെ അഞ്ചാം പന്തിൽ ബൗണ്ടറി നേടിയാണ് സെഞ്ച്വറി തികച്ചത്. 120 പന്തിൽ 135 റൺസ് നേടി താരം പുറത്തായി. 30 ടെസ്റ്റ് സെഞ്ച്വറിയും ഒരു ട്വൻ്റി20 അന്താരാഷ്ട്ര സെഞ്ച്വറിയും അടക്കം 83 സെഞ്ച്വറികളാണ് ഇപ്പോൾ താരത്തിൻ്റെ പേരിലുള്ളത്.
ഈ വർഷം ഫെബ്രുവരി 23 ന് ദുബൈയിൽ പാക്കിസ്ഥാനെതിരായ ചാമ്പ്യൻസ് ട്രോഫി മത്സരത്തിലായിരുന്നു താരത്തിന്റെ അവസാന സെഞ്ച്വറി. അന്ന് കോഹ്ലി പുറത്താകാതെ 100 റൺസ് നേടി ഇന്ത്യയെ വിജയത്തിലേക്ക് നയിച്ചു. ദക്ഷിണാഫ്രിക്കയ്ക്കെതിരെ ഏറ്റവും കൂടുതൽ ഏകദിന സെഞ്ച്വറികൾ (6) നേടിയ കോഹ്ലി, സച്ചിൻ ടെണ്ടുൽക്കറുടെയും ഡേവിഡ് വാർണറുടെയും അഞ്ച് സെഞ്ച്വറികൾ എന്ന റെക്കോർഡും ഇതോടെ മറികടന്നു.
റാഞ്ചിയിലെ ജെഎസ്സിഎ ഇന്റർനാഷണൽ സ്റ്റേഡിയത്തിൽ മികച്ച റെക്കോർഡാണ് കോഹ്ലിയ്ക്കുള്ളത്. ഈ മൈതാനത്ത് കോഹ്ലിയുടെ മൂന്നാമത്തെ ഏകദിന സെഞ്ച്വറിയാണ് ഇത്. ഇതേ മൈതാനത്ത് അഞ്ച് ഇന്നിംഗ്സുകൾ കളിച്ച കോഹ്ലി 500 ൽ അധികം റൺസ് നേടിയിട്ടുണ്ട്. മൂന്ന് സെഞ്ച്വറികൾക്ക് പുറമെ ഒരു അർദ്ധ സെഞ്ച്വറിയും ഈ മൈതാനത്ത് കോഹ്ലിയുടെ പേരിലുണ്ട്.
റാഞ്ചി ഏകദിനത്തിൽ രണ്ടാം വിക്കറ്റിൽ വിരാട് കോഹ്ലിയും രോഹിത് ശർമ്മയും ചേർന്ന് 136 റൺസിന്റെ കൂട്ടുകെട്ടാണ് പടുത്തുയർത്തിയത്. ഏകദിനത്തിൽ കോഹ്ലിയും രോഹിതും 100 റൺസ് കൂട്ടുകെട്ട് പങ്കിടുന്നത് ഇത് 20-ാം തവണയാണ്. രോഹിത് ശർമ്മ 51 പന്തിൽ അഞ്ച് ഫോറുകളും മൂന്ന് സിക്സറുകളും ഉൾപ്പെടെ 57 റൺസ് നേടി.
റാഞ്ചി ഏകദിനത്തിൽ കളത്തിലിറങ്ങിയ ഉടൻ തന്നെ വിരാട് കോഹ്ലിയും രോഹിത് ശർമ്മയും ഒരു വലിയ റെക്കോർഡ് സൃഷ്ടിച്ചു. ഏറ്റവും കൂടുതൽ അന്താരാഷ്ട്ര മത്സരങ്ങൾ ഒരുമിച്ച് കളിക്കുന്ന ഇന്ത്യൻ ജോഡി എന്ന ബഹുമതി! ഈ ജോഡിയുടെ 392-ാമത്തെ അന്താരാഷ്ട്ര മത്സരമായിരുന്നു ഇത്. 391 അന്താരാഷ്ട്ര മത്സരങ്ങൾ ഒരുമിച്ച് കളിച്ച ഇതിഹാസ ജോഡിയായ സച്ചിൻ ടെണ്ടുൽക്കർ – രാഹുൽ ദ്രാവിഡ് ജോഡിയെയാണ് ഇതോടെ കോഹ്ലിയും രോഹിതും മറികടന്നത്.
