ന്യൂഡൽഹി : സുപ്രീം കോടതിയിൽ ഫയൽ ചെയ്യുന്ന ജാമ്യ ഹർജികളിൽ പുതിയ മാർഗ്ഗരേഖ പുറത്തിറക്കി സുപ്രീം കോടതി രജിസ്ട്രി. ചീഫ് ജസ്റ്റിസ് സൂര്യകാന്ത് നിർദ്ദേശിച്ചതിനെ തുടർന്നാണ് മാർഗ്ഗരേഖ പുറത്തിറക്കിയത്. ജാമ്യ ഹർജികളിൽ തീരുമാനം അടിയന്തിരമായി ഉണ്ടാകുന്നതിന് ഇത് ഫലപ്രദമാകുമെന്നാണ് നിഗമനം.
ഇനി മുതൽ ജാമ്യ ഹർജികൾ ഫയൽ ചെയ്താൽ ഉടൻ തന്നെ സർക്കാർ അഭിഭാഷകർക്ക് / നോഡൽ ഓഫീസർമാർക്ക് അതിന്റെ പകർപ്പ് കൈമാറണം എന്നാണ് മാർഗ്ഗരേഖയിൽ നിർദ്ദേശിച്ചിരിക്കുന്നത്. നോഡൽ ഓഫീസർക്ക് പകർപ്പ് കൈമാറിയതിന്റെ രേഖ ഹാജരാക്കിയാൽ മാത്രമേ ജാമ്യ ഹർജി ലിസ്റ്റ് ചെയ്യുകയുള്ളൂ. ഹർജി കോടതിയുടെ പരിഗണനയ്ക്ക് വരുമ്പോൾ സർക്കാരിന്റെ നിലപാട് വ്യക്തമാക്കാൻ നോഡൽ ഓഫീസർ ഹാജർ ആയിരിക്കണമെന്നും മാർഗ്ഗരേഖയിൽ ചൂണ്ടിക്കാട്ടിയിട്ടുണ്ട്.
കേന്ദ്ര സർക്കാരിന്റെയും, സംസ്ഥാന സർക്കാരുകളുടെയും നോഡൽ ഓഫീസർമാരുടെ പട്ടിക സുപ്രീം കോടതി രജിസ്ട്രി പുറത്തിറക്കിയിട്ടുണ്ട്. സംസ്ഥാന സർക്കാരിന്റെ സ്റ്റാന്റിങ് കോൺസൽ ഹർഷദ് വി ഹമീദ് ആണ് കേരളത്തിന്റെ അന്വേഷണ ഏജൻസികളുമായി ബന്ധപ്പെട്ട കേസുകളുടെ നോഡൽ ഓഫീസർ. മാർഗ്ഗരേഖയിലെ നിർദ്ദേശം ഡിസംബർ ഒന്ന് മുതൽ നിലവിൽ വരും.
