കണ്ണൂർ : തളിപ്പറമ്പിലും പയ്യന്നൂരിലും സ്ഥാനാർത്ഥി നിർണ്ണയം പാളിയെന്ന് തുറന്ന് സമ്മതിച്ച് വിപുലീകൃത കണ്ണൂർ ജില്ലാ കമ്മിറ്റി റിപ്പോർട്ട്. പാർട്ടി വോട്ടുകൾ നഷ്ടമാകുമെന്ന് മുൻകൂട്ടി കാണാനായില്ലെന്നും കീഴ്ഘടകങ്ങളിലെ ചർച്ചകൾ ഗൗരവത്തിൽ എടുക്കാത്തത് വീഴ്ചയാണെന്നും റിപ്പോർട്ട് തുടർന്ന് പറയുന്നു.
വിഭാഗീയതയും വലിയൊരു പ്രശ്‌നമായി ചൂണ്ടിക്കാട്ടുന്നു. വിഭാഗീയത ഇല്ലാതാക്കുന്നതിൽ നേതൃത്വത്തിന് പറ്റിയ വീഴ്ചയും തോൽവിയിലേക്ക് നയിച്ചു. ഐക്യത്തോടെ സംഘടനയെ നയിക്കുന്നതിൽ പോരായ്മ വന്നു. വിഭാഗീയത പരിഹരിക്കാൻ ശക്തമായ നടപടി വേണമെന്നും റിപ്പോർട്ടിൽ നിർദ്ദേശമുണ്ട്.
മറ്റൊന്ന് കണക്കുകളിലെ ‘കൺഫ്യൂഷ’നാണ്. പാർട്ടി അംഗീകരിച്ച കണക്ക് പല അംഗങ്ങൾക്കും ബോദ്ധ്യപ്പെട്ടില്ലെന്ന വിമർശനം റിപ്പോർട്ടിൽ മുഴച്ചുനിൽക്കുന്നു.
കണ്ണൂരിൽ ഞായറാഴ്ച നടന്ന വിപുലീകൃത ജില്ലാ കമ്മിറ്റി യോഗം സിപിഐഎം പൊളിറ്റ്ബ്യൂറോ അംഗം പിണറായി വിജയനാണ് ഉദ്ഘാടനം ചെയ്തത്. സംസ്ഥാന സെക്രട്ടറി എം വി ഗോവിന്ദൻ, കേന്ദ്ര കമ്മിറ്റി അംഗങ്ങളായ ഇ പി ജയരാജൻ, പി കെ ശ്രീമതി, കെ കെ ശൈലജ, കെ എൻ ബാലഗോപാൽ, പുത്തലത്ത് ദിനേശൻ, കേന്ദ്ര കമ്മിറ്റിയിലെ പ്രത്യേക ക്ഷണിതാവ് ജോൺ ബ്രിട്ടാസ്, സംസ്ഥാന സെക്രട്ടേറിയറ്റ് അംഗങ്ങളായ പി ജയരാജൻ, എം വി ജയരാജൻ എന്നിവരും പങ്കെടുക്കുന്നു.
