ന്യൂഡൽഹി: സ്ത്രീകൾക്ക് പ്രതിമാസം 1,000 രൂപ ധനസഹായമായി വിതരണം ചെയ്യുന്ന മുഖ്യമന്ത്രി മഹിളാ സമ്മാൻ യോജനയ്ക്ക് ഡൽഹി സർക്കാർ അംഗീകാരം നൽകി. ഇന്നുമുതൽ 1,000 രൂപ വിതരണം ചെയ്യുമെന്നും അധികാരം നിലനിർത്തിയാൽ 2,100 രൂപയായി ഉയർത്തുമെന്നും എഎപി ദേശീയ കൺവീനർ അരവിന്ദ് കെജ്രിവാൾ പ്രഖ്യാപിച്ചു. അടുത്ത വർഷം ആദ്യം നിയമസഭാ തെരഞ്ഞെടുപ്പ് നടക്കാനിരിക്കെയാണ് പ്രഖ്യാപനം.
ഡൽഹിയിലെ സ്ത്രീകൾക്ക് പ്രതിമാസം 1,000 രൂപ താൻ വാഗ്ദാനം ചെയ്തിരുന്നുവെന്നും മുഖ്യമന്ത്രി അതിഷിയുടെ മന്ത്രിസഭ പദ്ധതിക്ക് അംഗീകാരം നൽകിയതായി അറിയിക്കുന്നതിൽ സന്തോഷമുണ്ടെന്നും അരവിന്ദ് കെജ്രിവാൾ പറഞ്ഞു. സ്ത്രീകൾക്ക് ഈ പദ്ധതിയിൽ രജിസ്റ്റർ ചെയ്ത് പ്രയോജനം നേടാം. ഈ പദ്ധതി നേരത്തെ പ്രഖ്യാപിക്കാൻ ആഗ്രഹിച്ചിരുന്നു. പക്ഷേ, അവർ തന്നെ ജയിലിലടച്ചു. സർക്കാർ വീണ്ടും അധികാരത്തിലെത്തിയാൽ പ്രതിമാസം നൽകുന്ന 1,000 രൂപ 2,100 രൂപയായി ഉയർത്തുമെന്നും കെജ്രിവാൾ പറഞ്ഞു.
2024-25ലെ സംസ്ഥാന ബജറ്റിൽ പ്രഖ്യാപിച്ച മുഖ്യമന്ത്രി മഹിളാ സമ്മാൻ യോജനയ്ക്കാണ് ഡൽഹി മന്ത്രിസഭ അംഗീകാരം നൽകിയത്. പദ്ധതിക്കായി 2,000 കോടി രൂപയാണ് വകയിരുത്തിയിരിക്കുന്നത്. 18നും 60നും ഇടയിലാണ് പ്രായമുള്ള സ്ത്രീകൾക്ക് പദ്ധതിയിലേക്ക് അപേക്ഷിക്കാം. സർക്കാർ ഉദ്യോഗസ്ഥർ, പെൻഷൻ സ്വീകരിക്കുന്നവർ, ആദായ നികുതി റിട്ടേൺ സമർപ്പിക്കുന്നവർ എന്നിവർ മഹിളാ സമ്മാൻ യോജനയ്ക്ക് അനർഹരാണ്. സ്വന്തമായി വ്യവസായം നടത്തുന്ന സ്ത്രീകൾക്കും ഡൽഹി സ്വദേശികളല്ലാത്ത സ്ത്രീകൾക്കും പദ്ധതിയിലേക്ക് യോഗ്യതയില്ല. ഈ വർഷം ജനുവരിയിൽ പ്രസിദ്ധീകരിച്ച അന്തിമ വോട്ടർ പട്ടിക പ്രകാരം, രാജ്യതലസ്ഥാനത്ത് 67,30,371 വനിതാ വോട്ടർമാരുണ്ട്
