കൊച്ചി: ബോബി ചെമ്മണ്ണൂരിനെതിരെ കടുത്ത വിമര്ശനവുമായി ഹൈക്കോടതി. നാടകം കളിക്കരുത്. വേണ്ടി വന്നാൽ ജാമ്യം റദ്ദാക്കാന് കോടതിക്കറിയാമെന്നും മുന്നറിപ്പ്. കോടതിയെ മുന്നില് നിര്ത്തി നാടകം കളിക്കരുത്. കഥ മെനയരുത്. മാധ്യമ ശ്രദ്ധ കിട്ടാന് വേണ്ടിയാണോ ബോബി ചെമ്മണ്ണൂരിന്റെ പ്രവർത്തിയെന്നും കോടതി ചോദിച്ചു.
പ്രതിഭാഗം അഭിഭാഷകനെ വിളിച്ചുവരുത്തിയാണ് കോടതിയുടെ താക്കീത്. ജാമ്യം അനുവദിച്ചിട്ടും കഴിഞ്ഞദിവസം പുറത്തിറങ്ങാതിരുന്ന നടപടിയില് 12 മണിക്കകം വിശദീകരണം നല്കണം ഇല്ലെങ്കില് ജാമ്യം റദ്ദാക്കുമെന്നും ഹൈക്കോടതി അറിയിച്ചു. കേസില് അന്വേഷണം രണ്ടാഴ്ച്ചക്കകം പൂര്ത്തിയാക്കാന് നിര്ദ്ദേശം നല്കുമെന്നും കോടതി വ്യക്തമാക്കി. ഇങ്ങനെയാണോ പ്രതി പെരുമാറേണ്ടത്. സീനിയര് അഭിഭാഷകനെ കൂടി പ്രതി അപമാനിച്ചു. ബോബി ചെമ്മണ്ണൂര് നിയമത്തിന് അതീതനല്ലെന്നും കോടതി വ്യക്തമാക്കി.
ജസ്റ്റിസ് പി വി കുഞ്ഞികൃഷ്ണന്റെ ബെഞ്ചാണ് സ്വമേധയാ ഹര്ജി പരിഗണിക്കുന്നത്. നിയമവ്യവസ്ഥയെ വെല്ലുവിളിക്കുന്ന നാടകീയ സംഭവങ്ങളായിരുന്നു ബോബി ചെമ്മണ്ണൂരിന് ജാമ്യം അനുവദിച്ചതിന് പിന്നാലെ കഴിഞ്ഞദിവസം ഉണ്ടായത്. ഹൈക്കോടതി ജാമ്യം അനുവദിച്ചിട്ടും ജാമ്യം നടപ്പാക്കേണ്ടതില്ലെന്ന് ബോബി ചെമ്മണ്ണൂര് അഭിഭാഷകരെ അറിയിക്കുകയായിരുന്നു. റിമാന്ഡ് കാലാവധി കഴിഞ്ഞിട്ടും സാങ്കേതിക പ്രശ്നങ്ങളില് കുരുങ്ങി പുറത്തിറങ്ങാന് പറ്റാത്ത തടവുകാര്ക്ക് ഐക്യദാര്ഢ്യം പ്രഖ്യാപിച്ചു കൊണ്ടാണ് ബോബി ചെമ്മണ്ണൂര് ജയിലില് തുടരാന് തീരുമാനിച്ചതെന്നായിരുന്നു പത്രവാർത്തകളും ബോബിയുടെ ‘ഫാൻസി’ൻ്റെ പ്രചരണവും.
