ന്യൂയോർക്ക് : ന്യൂയോർക്കിലെ ലാഗ്വാർഡിയ വിമാനത്താവളത്തിൽ ഫയർ ട്രക്കുമായി കൂട്ടിയിടിച്ച് എയർ കാനഡ വിമാനം തകർന്നു. അപകടത്തിൽ രണ്ട് മറുഷ്യജീവനുകൾ പൊലിഞ്ഞു. മോൺട്രിയൽ ട്രൂഡോ അന്താരാഷ്ട്ര വിമാനത്താവളത്തിൽ നിന്ന് 80-ഓളം യാത്രക്കാരുമായി വന്ന എയർ കാനഡ ഫ്ലൈറ്റ് 8646 ആണ് അപകടത്തിൽപെട്ടത്.
വിമാനം താവളത്തിൽ ഇറങ്ങിയ ശേഷം ടാക്സി ചെയ്യുന്നതിനിടെ ഫയർ ട്രക്കിൽ ഇടിക്കുകയായിരുന്നു. അപകടത്തിൽ നാലു പേർക്ക് പരിക്കേറ്റതായി എൻ.ബി.സി റിപ്പോർട്ട് ചെയ്തു. ലാൻഡിംഗ് കഴിഞ്ഞ് ഏകദേശം 30 മൈൽ വേഗതയിൽ നീങ്ങുമ്പോഴായിരുന്നു കൂട്ടിയിടി.
അപകടത്തെ തുടർന്ന് അധികൃതർ വിമാനത്താവളത്തിന്റെ പ്രവർത്തനം നിർത്തിവെക്കുകയും വരുന്ന വിമാനങ്ങൾ തിരിച്ചുവിടുകയും ചെയ്തു. വിമാനം വാഹനത്തിലിടിക്കുന്നതിന് തൊട്ടു മുമ്പ് “നിർത്തൂ, നിർത്തൂ, നിർത്തൂ! ട്രക്ക് 1” എന്ന് എയർ ട്രാഫിക് കൺട്രോളർ വിളിച്ചുപറയുന്നത് ഓഡിയോയിൽ കേൾക്കാം. അപകടത്തിന് ശേഷം വലിയ തോതിലുള്ള രക്ഷാപ്രവർത്തനമാണ് നടന്നത്.
എൻ.ബി.സി പുറത്തുവിട്ട പ്രാഥമിക വിവരങ്ങൾ അനുസരിച്ച് ഒരു സർജന്റിനും ഒരു ഓഫീസർക്കും കൈകാലുകൾക്ക് ഒടിവ് സംഭവിച്ചിട്ടുണ്ടെങ്കിലും ആശുപത്രിയിൽ പ്രവേശിപ്പിച്ച ഇവരുടെ നില തൃപ്തികരമാണ്. മറ്റു വലിയ പരിക്കുകളൊന്നും ഇതുവരെ റിപ്പോർട്ട് ചെയ്തിട്ടില്ല.
എയർ ട്രാഫിക് കൺട്രോളർമാരും പൈലറ്റുമാരും തമ്മിലുള്ള സംഭാഷണത്തിന്റെ ഓഡിയോ ക്ലിപ്പിൽ പരിഭ്രാന്തി നിറഞ്ഞ മുന്നറിയിപ്പുകളും ലാൻഡിംഗ് ഒഴിവാക്കുന്നതും റൺവേ ഒഴിഞ്ഞുമാറാനുള്ള അടിയന്തര ശ്രമങ്ങളും വെളിപ്പെടുന്നുണ്ട്. സോഷ്യൽ മീഡിയയിൽ പ്രചരിക്കുന്ന വീഡിയോകളിൽ വിമാനത്തിന്റെ കോക്ക്പിറ്റിന് തകരാറുകൾ സംഭവിച്ചതായി കാണാം.
അപകടം നടന്ന ഉടൻ തന്നെ അടിയന്ത സാഹചര്യം കണക്കിലെടുത്ത് വിമാനത്താവളം അടച്ചു. മോൺട്രിയലിൽ നിന്നുള്ള വിമാനം ഏകദേശം 24 മൈൽ വേഗതയിൽ സഞ്ചരിക്കുമ്പോഴാണ് വാഹനത്തിലിടച്ചതെന്ന് ഫ്ലൈറ്റ് റഡാർ 24 ഡാറ്റ കാണിക്കുന്നു. എയർ കാനഡയുടെ പ്രാദേശിക പങ്കാളിയായ ജാസ് ഏവിയേഷനാണ് ഈ വിമാനം പ്രവർത്തിപ്പിക്കുന്നത്. ഇടിച്ച വാഹനം ഫയർ ട്രാക്ക് ആയിരുന്നോ എന്ന കാര്യത്തിൽ സ്ഥിരീകരണം വന്നിട്ടില്ല.
ഫെഡറൽ ഏവിയേഷൻ അഡ്മിനിസ്ട്രേഷൻ (FAA) വിമാനത്താവളത്തിൽ ഗ്രൗണ്ട് സ്റ്റോപ്പ് ഏർപ്പെടുത്തി. രക്ഷാപ്രവർത്തനങ്ങൾ പൂർത്തിയായി കഴിഞ്ഞാൽ അന്വേഷണം ആരംഭിക്കും. ലാൻഡിംഗ് വിമാനത്തിന്റെ പാതയിലേക്ക് ഒരു ഗ്രൗണ്ട് വാഹനം എങ്ങനെ എത്തി എന്നതിനെ കുറിച്ചായിരിക്കും പ്രധാനമായും അന്വേഷണം നടത്തുക. എ.ടി.സി ഓഡിയോയിലെ വിവരങ്ങൾ അന്വേഷണത്തിൽ നിർണായകമാകും.
