ന്യൂഡൽഹി : വായു ഗുണനിലവാര തകർച്ചയും ഒപ്പം അതിശൈത്യവും തുടരുന്ന ഡൽഹിയിൽ സർക്കാർ ഗ്രേഡഡ് റെസ്പോൺസ് ആക്ഷൻ പ്ലാൻ (ഗ്രാപ്) 4 പ്രോട്ടോക്കോൾ ഇന്നു രാവിലെ 8 മണി മുതൽ നിലവിൽ വന്നു. 10,12 ക്ലാസ് ഒഴികെ മറ്റെല്ലാ ക്ലാസുകൾക്കും മുഖ്യമന്ത്രി അവധി പ്രഖ്യാപിച്ചിട്ടുണ്ട്. ഓൺലൈനായി ക്ലാസുകൾ എടുക്കാനാണ് നിർദ്ദേശം. കോളജുകളിലെയും റഗുലർ ക്ലാസ് ഒഴിവാക്കി ഓൺലൈനാക്കണം. സ്വകാര്യ സ്ഥാപനങ്ങളിലെ ജീവനക്കാരിൽ 50% പേർക്കെങ്കിലും വർക്ക് ഫ്രം ഹോം നൽകണം.
കുട്ടികൾ, പ്രായമായവർ, ശ്വാസകോശ രോഗികൾ, ഹൃദ്രോഗികൾ, മറ്റു വിട്ടുമാറാത്ത രോഗങ്ങളുള്ളവർ എന്നിവർ ഔട്ഡോർ പ്രവർത്തനങ്ങൾ ഒഴിവാക്കണമെന്നും വീടിനുള്ളിൽ കഴിയണമെന്നും നിർദേശമുണ്ട്.
ഡൽഹി വിമാനത്താവളത്തിൽ 160ലേറെ വിമാനങ്ങളാണ് കാഴ്ചക്കുറവ് മൂലം വൈകിയത്. വിമാനങ്ങളുടെ പുറപ്പെടൽ ശരാശരി 20 മിനിറ്റിലേറെ വൈകുന്നുണ്ടെന്നും
വ്യോമഗതാഗത നിരീക്ഷണ ഏജൻസിയായ ഫ്ലൈറ്റ്റഡാർ 24 റിപ്പോർട്ട് ചെയ്യുന്നു. കനത്ത മൂടൽമഞ്ഞ് കാരണം ഡൽഹി, ആനന്ദ് വിഹാർ റെയിൽവേ സ്റ്റേഷനിൽ എത്തേണ്ട 28 ട്രെയിനുകൾ 2 മുതൽ 9 മണിക്കൂർ വരെ വൈകിയാണ് ഓടിക്കൊണ്ടിരിക്കുന്നത്.
പൊതു ഗതാഗതം പ്രോത്സാഹിപ്പിക്കുക, റജിസ്ട്രേഷൻ നമ്പറുകളുടെ ഒറ്റ-ഇരട്ട അടിസ്ഥാനത്തിൽ വാഹനങ്ങൾ ഓടിക്കാൻ അനുവദിക്കുക തുടങ്ങിയ നടപടികളും സ്വീകരിക്കും. അവശ്യസാധനങ്ങൾ കൊണ്ടുപോകാൻ ഉപയോഗിക്കുന്നവ ഒഴികെ ഡൽഹിയിലേക്ക് പ്രവേശിക്കുന്ന ഡീസൽ, പെട്രോൾ ട്രക്കുകൾക്ക് നിയന്ത്രണം ഏർപ്പെടുത്തി. എൽഎൻജി, സിഎൻജി, ഇലക്ട്രിക് ട്രക്കുകൾക്ക് ഇളവുണ്ട്. ഹൈവേകൾ, റോഡുകൾ, മേൽപാലങ്ങൾ, പൈപ്പ് ലൈനുകൾ എന്നിവയുമായി ബന്ധപ്പെട്ടത് ഒഴികെ മറ്റ് നിർമ്മാണ പ്രവർത്തനങ്ങൾ നിരോധിക്കും. .
