ന്യൂഡൽഹി : കോവിഡ്-19 വീണ്ടും വ്യാപകമാകുന്നെന്ന് റിപ്പോർട്ടുകൾ. ഹോങ്കോങ്, സിംഗപ്പൂർ തായ്ലാൻ്റ്, ചൈന എന്നിവടങ്ങളിൽ നിന്നാണ് കോവിഡിൻ്റെ വ്യാപനം ഇപ്പോൾ റിപ്പോർട്ട് ചെയ്യപ്പെട്ടിട്ടുള്ളത്.
കഴിഞ്ഞ 10 ആഴ്ചയ്ക്കുള്ളിൽ ഹോങ്കോങ്ങിൽ കോവിഡ് കേസുകൾ ഓരോ ആഴ്ചയും 30 മടങ്ങിലധികം വർദ്ധിക്കുന്നുവെന്നാണ് വാർത്ത. സിംഗപ്പൂരിലും ഒരാഴ്ചയ്ക്കുള്ളിൽ കേസുകൾ ഏകദേശം 30 ശതമാനം വർദ്ധിച്ചു. ചൈനയിൽ നിന്നും തായ്‌ലൻഡിൽ നിന്നും കോവിഡ് കേസുകൾ വർദ്ധിക്കുന്നതായാണ് റിപ്പോർട്ടുകൾ.
മാർച്ച് തുടക്കത്തിലെ ആഴ്ചയിൽ 33 കേസുകളുമായിട്ടായിരുന്നു ഹോങ്കോങ്ങിൽ കോവിഡ് വരവറിയിച്ചതെങ്കിൽ 2025 മെയ് 10 ന് അവസാനിച്ച ആഴ്ചയിൽ അത് 1,042 കേസുകളായി ഉയർന്നു. അതിന് തൊട്ടുമുമ്പുള്ള ആഴ്ചയിൽ ഇത് 972 ആയിരുന്നു എന്നാണ് റിപ്പോർട്ട്. അതായത് മാർച്ച് മുതൽ കേസുകൾ തുടർച്ചയായി വർദ്ധിച്ചുകൊണ്ടിരിക്കുന്നു
സിംഗപ്പൂരിൽ നിലവിൽ പടരുന്ന ഏറ്റവും പ്രബലമായ കോവിഡ് വകഭേദങ്ങൾ LF.7 ഉം NB.1.8 ഉം ആണ്. രണ്ടും JN.1 വേരിയന്റിന്റെ അടുത്ത തലമുറയാണ്. നിലവിലെ കോവിഡ് വാക്സിൻ നിർമ്മിക്കാൻ JN.1 വകഭേദം ഉപയോഗിച്ചുവെന്നത് ശ്രദ്ധിക്കേണ്ടതാണ്.
തായ്‌ലൻഡിലും സമീപകാല അവധി ദിവസങ്ങൾക്ക് ശേഷം കോവിഡ് കേസുകൾ അതിവേഗം വർദ്ധിച്ചു. ഈ വർഷം ഇതുവരെ 71,067 കേസുകളും 19 മരണങ്ങളും അവിടെ റിപ്പോർട്ട് ചെയ്യപ്പെട്ടിട്ടുണ്ട്.
ഇന്ത്യയിൽ നിലവിലെ കൊറോണ വൈറസ് സ്ഥിതി നിയന്ത്രണവിധേയമാണെന്ന് ഔദ്യോഗിക വൃത്തങ്ങൾ അവകാശപ്പെടുന്നു. എങ്കിലും സിംഗപ്പൂരിലും ഹോങ്കോങ്ങിലും കോവിഡ് കേസുകൾ വർദ്ധിക്കുന്നതിനെക്കുറിച്ചുള്ള റിപ്പോർട്ടുകൾ ആരോഗ്യ അധികൃതർ നിരീക്ഷിച്ചുവരികയാണെന്നാണ് അറിയുന്നത്.
നാഷണൽ സെന്റർ ഫോർ ഡിസീസ് കൺട്രോൾ, എമർജൻസി മെഡിക്കൽ റിലീഫ് വിഭാഗം, ഡിസാസ്റ്റർ മാനേജ്‌മെന്റ് സെൽ, ഇന്ത്യൻ കൗൺസിൽ ഓഫ് മെഡിക്കൽ റിസർച്ച്, കേന്ദ്ര സർക്കാർ ആശുപത്രികൾ എന്നിവിടങ്ങളിൽ നിന്നുള്ള വിദഗ്ധരുടെ അവലോകന യോഗം തിങ്കളാഴ്ച ഡയറക്ടർ ജനറൽ ഓഫ് ഹെൽത്ത് സർവീസസിന്റെ അധ്യക്ഷതയിൽ നടന്നു.
“ഇന്ത്യയിലെ നിലവിലെ കോവിഡ്-19 സ്ഥിതി നിയന്ത്രണവിധേയമാണെന്ന് യോഗം നിഗമനം ചെയ്തു. 2025 മെയ് 19 വരെ, ഇന്ത്യയിൽ സജീവമായ കോവിഡ്-19 കേസുകളുടെ എണ്ണം 257 ആണ്, രാജ്യത്തെ വലിയ ജനസംഖ്യ കണക്കിലെടുക്കുമ്പോൾ ഇത് വളരെ കുറഞ്ഞ കണക്കാണ്.”
“ഈ കേസുകളിൽ മിക്കവാറും എല്ലാം തന്നെ സൗമ്യമാണ്, ആശുപത്രിയിൽ പ്രവേശനം ആവശ്യമില്ല,” ഔദ്യോഗിക വൃത്തങ്ങൾ അവകാശപ്പെടുന്നു.
ഇന്റഗ്രേറ്റഡ് ഡിസീസ് സർവൈലൻസ് പ്രോഗ്രാം (IDSP), ഐസിഎംആർ എന്നിവയിലൂടെ കോവിഡ്-19 ഉൾപ്പെടെയുള്ള വൈറൽ ശ്വസന രോഗങ്ങളുടെ നിരീക്ഷണത്തിനായി രാജ്യത്തിന് ശക്തമായ ഒരു സംവിധാനമുണ്ട്.
ഇൻഫ്ലുവൻസ പോലുള്ള രോഗങ്ങളും കടുത്ത ശ്വാസകോശ അണുബാധ കേസുകളും നിരീക്ഷിക്കാൻ ആശുപത്രികളോട് ആവശ്യപ്പെട്ടിട്ടുണ്ട്.
പൊതുജനാരോഗ്യം സംരക്ഷിക്കുന്നതിന് ഉചിതമായ നടപടികൾ സ്വീകരിക്കുന്നുണ്ടെന്ന് ഉറപ്പുവരുത്തുന്നതിനായി, സ്ഥിതിഗതികൾ സൂക്ഷ്മമായി നിരീക്ഷിക്കുന്നതിൽ കേന്ദ്ര ആരോഗ്യ മന്ത്രാലയം ജാഗ്രത പാലിക്കുകയും മുൻകൈയെടുക്കുകയും ചെയ്യുന്നുണ്ടെന്നാണ് അധികൃതർ അറിയിക്കുന്നത്.
