പാലക്കാട് : പാലക്കാട് ദേശീയപാതയിൽ ഒട്ടേറെ അപകടമരണങ്ങൾ നടന്ന പനയംപാടം വളവിൽ ഔദ്യോഗിക വാഹനം ഓടിച്ച് പരിശോധന നടത്തി ഗതാഗതമന്ത്രി കെ.ബി.ഗണേഷ് കുമാർ. റോഡിന്റെ നിർമ്മാണത്തിൽ അപാകതയുണ്ടെന്നും അത് പരിഹരിക്കാൻ ദേശീയപാത അതോറിറ്റിയുമായി ചർച്ച നടത്തുമെന്നും മന്ത്രി പറഞ്ഞു. അറ്റകുറ്റപ്പണിക്ക് ദേശീയപാത അതോറിറ്റി പണം അനുവദിച്ചില്ലെങ്കിൽ സർക്കാർ പണം അനുവദിക്കും.
കഴിഞ്ഞ ദിവസമാണ് പരീക്ഷയെഴുതി സ്ക്കൂളിൽ നിന്ന് വീട്ടിലേക്കു നടന്നുപോവുമ്പോൾ പനയംപാടം വളവിൽ വെച്ച് ലോറി ദേഹത്തേക്കു മറിഞ്ഞ് 4 വിദ്യാർത്ഥിനികൾ മരിച്ചത്. ഇതേ തുടർന്നാണ്
പനയംപാടത്ത് മന്ത്രിയുടെ അടിയന്തര പരിശോധന. റോഡ് നിർമ്മാണത്തിൽ അപാകതകളുണ്ടെന്ന് മന്ത്രി പറഞ്ഞു. പ്രാദേശിക
സാഹചര്യം മനസ്സിലാക്കാതെയാണ് പല റോഡുകളും നിർമ്മിക്കുന്നത്. പനയംപാടത്ത് വളവിൽ റോഡിനു നടുവിലെ വരമാറ്റി രണ്ടു മീറ്റർ അപ്പുറത്തേക്ക് ഡിവൈഡർ വയ്ക്കും. ഓട്ടോസ്റ്റാൻഡ് ഇടതു ഭാഗത്തേക്ക് മാറ്റും. റോഡിന്റെ പ്രതലം പരുക്കനാക്കും. വെള്ളക്കെട്ട് ഒഴിവാക്കാൻ നടപടി സ്വീകരിക്കും. റോഡിലെ തെന്നൽ മാറാൻ ദേശീയപാത അധികൃതരുമായി സംസാരിക്കുമെന്നും മന്ത്രി പറഞ്ഞു.
‘’പനയംപാടം ജംക്ഷനോട് അടുത്തുവരുമ്പോൾ ഡ്രൈവർമാർക്ക് വലത്തേക്ക് വാഹനം ചേർക്കാൻ തോന്നും. റോഡ് പണിതതിലെ പ്രശ്നമാണത്. പാലക്കാടുനിന്ന് കോഴിക്കോടേയ്ക്ക് വരുമ്പോൾ, റോഡിന്റെ ഒരു ഭാഗത്ത് വീതി കുറവാണ്. ഒരു വണ്ടിക്ക്
പോകാവുന്ന വീതിയേയുള്ളൂ. മറുവശത്ത് രണ്ടു വാഹനം കടന്നുപോകാവുന്ന വീതിയുണ്ട്. നടുവിലുള്ള വര കേന്ദ്രീകരിച്ച് ഡ്രൈവർമാർ പോകുമ്പോൾ വാഹനം വലത്തേക്ക് കയറിവരും. അങ്ങനെ കയറിവന്ന ലോറിയുടെ പുറകുവശമാണ് സിമന്റ് ലോറിയിൽ തട്ടിയത്. ” – ഗണേഷ് കുമാർ വ്യക്തമാക്കി.
