തിരുവനന്തപുരം : ഇന്ത്യയിലെ ആദ്യത്തെ സമ്പൂർണ്ണ ഡിജിറ്റൽ സംസ്ഥാനമായി കേരളം. ഇത് കേരളത്തിനും ലോകമെമ്പാടുമുള്ള ഓരോ മലയാളിക്കും അഭിമാന നിമിഷമാണെന്ന് മുഖ്യമന്ത്രി പിണറായി വിജയൻ.
ഈ നേട്ടത്തിന് പിന്നിൽ പ്രവർത്തിച്ച യുവാക്കളെ മുഖ്യമന്ത്രി പ്രത്യേകം അഭിനന്ദിച്ചു. യുവജനങ്ങളുടെ അർപ്പണബോധവും പങ്കാളിത്തവുമാണ് ഈ നേട്ടം സാദ്ധ്യമാക്കിയതെന്നും അദ്ദേഹം പറഞ്ഞു.
തിരുവനന്തപുരം സെൻട്രൽ സ്റ്റേഡിയത്തിൽ നടന്ന ചടങ്ങിലാണ് മുഖ്യമന്ത്രി ഈ സുപ്രധാന നേട്ടം പ്രഖ്യാപിച്ചത്. നിലവിൽ രാജ്യത്ത് 38% കുടുംബങ്ങൾക്ക് മാത്രമാണ് ഡിജിറ്റൽ സാക്ഷരതയുള്ളതെന്നതിനാൽ ഈ നേട്ടം കേരളത്തിന് ഏറെ അഭിമാനകരമാണെന്ന് മുഖ്യമന്ത്രി പറഞ്ഞു. മൂന്ന് ഘട്ടങ്ങളിലായി നടന്ന ഈ ക്യാമ്പയിന് 2.5 ലക്ഷത്തിലധികം സന്നദ്ധപ്രവർത്തകർ നേതൃത്വം നൽകി. 1991 ഏപ്രിലിൽ സമ്പൂർണ്ണ സാക്ഷരത നേടിയ ആദ്യ സംസ്ഥാനം കേരളമായിരുന്നെന്നും, അന്നും എൽഡിഎഫ് ഭരണത്തിലായിരുന്നെന്നും അദ്ദേഹം ചൂണ്ടിക്കാട്ടി. തുടക്കത്തിൽ 14-നും 65-നും ഇടയിൽ പ്രായമുള്ളവരെ ലക്ഷ്യമിട്ടാണ് പദ്ധതി ആരംഭിച്ചതെങ്കിലും, പിന്നീട് എല്ലാ പ്രായക്കാർക്കും ഇതിൽ പങ്കാളിയാകാൻ അവസരം നൽകി.
എറണാകുളം സ്വദേശിയായ 104-കാരൻ അബ്ദുള്ള മൗലവിയാണ് ഡിജിറ്റൽ സാക്ഷരത നേടിയ ഏറ്റവും പ്രായംകൂടിയ വ്യക്തി. അദ്ദേഹവുമായി മുഖ്യമന്ത്രി വീഡിയോ കോളിൽ സംസാരിച്ചു. തിരുവനന്തപുരത്തെ പുല്ലമ്പാറ പഞ്ചായത്താണ് സമ്പൂർണ്ണ ഡിജിറ്റൽ സാക്ഷരത നേടിയ ആദ്യ തദ്ദേശ സ്ഥാപനം. ഇത് സംസ്ഥാനത്തിന് മുഴുവൻ മാതൃകയായെന്നും മുഖ്യമന്ത്രി പറഞ്ഞു.
ഡിജിറ്റൽ സാക്ഷരതയോടൊപ്പം ഡിജിറ്റൽ ആക്സസും പ്രധാനമാണെന്ന് ചൂണ്ടിക്കാട്ടിയ മുഖ്യമന്ത്രി, സംസ്ഥാനത്ത് കുറഞ്ഞ നിരക്കിൽ അതിവേഗ ഇന്റർനെറ്റ് ലഭ്യമാക്കുന്ന കെ-ഫോൺ പദ്ധതിയെക്കുറിച്ചും സംസാരിച്ചു. ഇന്റർനെറ്റ് ഒരു നിയമപരമായ അവകാശമായി പ്രഖ്യാപിച്ച ആദ്യ സംസ്ഥാനം കേരളമാണെന്നും അദ്ദേഹം ഓർമ്മിപ്പിച്ചു. വിദൂര ഗോത്രമേഖലകളായ ഇടമലക്കുടിയിലും ഈ പദ്ധതി വിജയകരമായി നടപ്പാക്കി.
83 ലക്ഷം ആളുകളിൽ നടത്തിയ സർവേയിൽ 29 ലക്ഷം പേരാണ് ഡിജിറ്റൽ സാക്ഷരതയില്ലാത്തവരായി കണ്ടെത്തിയത്. പിന്നീട് പ്രായപരിധി ഒഴിവാക്കിയപ്പോൾ 75-നും 90-നും ഇടയിൽ പ്രായമുള്ള 1.3 ലക്ഷത്തിലധികം പേർ കൂടി പരിശീലനത്തിൽ പങ്കെടുത്തു. പദ്ധതിയുടെ രണ്ടാം ഘട്ടത്തിൽ പൗരന്മാർക്ക് എല്ലാ രേഖകളും ഡിജിലോക്കർ വഴി ലഭ്യമാക്കുമെന്നും മുഖ്യമന്ത്രി പ്രഖ്യാപിച്ചു. ഇത്തരമൊരു സംരംഭം ആരംഭിക്കുന്ന രാജ്യത്തെ ആദ്യ സംസ്ഥാനമായി കേരളം മാറുമെന്നും അദ്ദേഹം പറഞ്ഞു.
