ചെന്നൈ: ഉരുൾപൊട്ടൽ നാശം വിതച്ച വയനാടിന് സഹായഹസ്തവുമായി നയൻതാരയും വിഘ്നേഷും. മുഖ്യമന്ത്രിയുടെ ദുരിതാശ്വാസ നിധിയിലേക്ക് 20 ലക്ഷം രൂപയാണ് താരദമ്പതികള് സഹായധനം നൽകിയത്. വിവരം വിഘ്നേഷ് തന്നെയാണ് തന്റെ ഇന്സ്റ്റഗ്രാം അക്കൗണ്ടിലൂടെ പങ്കുവെച്ചത്. നഷ്ടങ്ങൾക്ക് ഇത് പകരമാകില്ലെങ്കിലും ഈ അവസ്ഥയിൽ പരസ്പരം സഹായിക്കേണ്ടതിന്റെ ആവശ്യകത മനസിലാക്കുന്നു എന്നും അദ്ദേഹം കുറിച്ചു.
വയനാട് ഉരുൾപൊട്ടലിൽ നിരവധി തമിഴ് സിനിമാതാരങ്ങൾ സഹായവുമായെത്തിയത്. സൂര്യ, കാർത്തി, ജ്യോതിക, വിക്രം, കമൽഹാസൻ, രശ്മിക തുടങ്ങിയ താരങ്ങളെല്ലാം കഴിഞ്ഞ ദിവസം സംഭാവനകൾ നൽകിയിരുന്നു.
മലയാളി താരങ്ങളായ മമ്മൂട്ടി, ദുൽഖർ സല്മാന്, ഫഹദ്, നസ്രിയ, നവ്യ നായർ, പാർവ്വതി കൃഷ്ണ തുടങ്ങി നിരവധി താരങ്ങൾ ഇതിനോടകം തന്നെ മുഖ്യമന്ത്രിയുടെ ദുരിതാശ്വാസ നിധിയിലേക്ക് സഹായധനം നൽകിക്കഴിഞ്ഞു.
കേരളത്തെയാകെ പിടിച്ചു കുലുക്കിയ ഉരുൾപൊട്ടൽ സംഭവിച്ചത് ജൂലായ് 30 പുലർച്ചെ 1.30 ന് ആണ്. ദുരന്തത്തിന്റെ നാലാം ദിനം വരെ ലഭ്യമായ വിവരമനുസരിച്ച് മരിച്ചവരുടെ എണ്ണം 331 ആയി.
