ന്യൂഡല്ഹി: തൃശൂർ പാലിയേക്കര ടോള്പിരിവ് നാലാഴ്ചത്തേക്ക് സ്റ്റേ ചെയ്ത കേരള ഹൈക്കോടതി വിധിക്കെതിരെ സുപ്രീംകോടതിയെ സമീപിച്ച് നാഷണൽ ഹൈവേ അതോറിറ്റി ഓഫ് ഇന്ത്യ. ടോള് പിരിക്കുന്നത് തടഞ്ഞുകൊണ്ടുള്ള ഹൈക്കോടതിയുടെ ഉത്തരവ് റദ്ദാക്കണമെന്നാണ് അപ്പീലിൽ നാഷണൽ ഹൈവേ അതോറിറ്റി ആവശ്യം.
ദേശീയപാത ഇടപ്പള്ളി മുതല് മണ്ണുത്തിവരെയുള്ള റോഡുകളുടെ ശോച്യാവസ്ഥയും ഗതാഗതക്കുരുക്കും മുൻനിർത്തിയാണ് ഹൈക്കോടതി ടോള് പിരിവ് സ്റ്റേ ചെയ്തത്. നാല് ആഴ്ചയ്ക്കുള്ളില് പ്രശ്നം പരിഹരിക്കണമെന്നാണ് ഹൈക്കോടതി ജസ്റ്റിസുമാരായ എ. മുഹമ്മദ് മുഷ്താഖും ഹരിശങ്കര് വി. മേനോനും അടങ്ങിയ ഡിവിഷൻ ബെഞ്ചിൻ്റെ ഉത്തരവ്. തൃശ്ശൂര് ഡിസിസി പ്രസിഡന്റ് ജോസഫ് ടാജറ്റ്, ഷാജി കോടങ്കണ്ടത്ത് തുടങ്ങിയവര് ഫയല്ചെയ്ത ഹര്ജികളിലാണ് നടപടി.
ഫെബ്രുവരി മുതല് സമയം നല്കിയിട്ടും പ്രശ്നപരിഹാരത്തിന് ദേശീയപാതാ അതോറിറ്റി നടപടി സ്വീകരിച്ചില്ലെന്ന് കോടതി കുറ്റപ്പെടുത്തി. ടോള് കൊടുക്കുകയെന്നത് യാത്രക്കാരുടെ നിയമപരമായ ബാദ്ധ്യതയാണ്. എന്നാല്, സുഗമമായ ഗതാഗതം ഉറപ്പാക്കുന്നതില് വീഴ്ചവരുമ്പോള് ടോള് ആവശ്യപ്പെടാന് നാഷണൽ ഹൈവേ അതോറിറ്റിക്കും കരാറുകാർക്കും കഴിയില്ല. രണ്ടുമുതല് മൂന്നുമണിക്കൂര്വരെ ഗതാഗതക്കുരുക്കാണ് അവിടെ അനുഭവപ്പെടുന്നു. 65 കിലോമീറ്റര് ദൂരത്തില് നാലുകിലോമീറ്ററില് മാത്രമെ ഗതാഗതക്കുരുക്കുള്ളൂ എന്ന നാഷണൽ ഹൈവേ അതോറിറ്റിയുടെ വാദം കോടതി തള്ളി.
പ്രശ്നപരിഹാരത്തിനായി ജൂലായ് 17-ന് ചീഫ് സെക്രട്ടറിയുടെ അദ്ധ്യക്ഷതയില്ച്ചേര്ന്ന യോഗത്തിലെടുത്ത തീരുമാനങ്ങൾ നാലാഴ്ചയ്ക്കകം നടപ്പാക്കണമെന്ന് കോടതി നിര്ദ്ദേശിച്ചിരുന്നു. വാഹനങ്ങള് തിരിച്ചുവിടുന്ന സര്വ്വീസ് റോഡുകള് ദിവസവും പരിശോധിച്ച് സഞ്ചാരയോഗ്യമാക്കണം, മുരിങ്ങൂരിൽ ഗതാഗതം സുഗമമാക്കാന് പഞ്ചായത്ത് റോഡുകളുടെ അറ്റകുറ്റപ്പണി നടത്തണം, ആമ്പല്ലൂരില്നിന്ന് ടോള്പ്ലാസ വരെയുള്ള ഭാഗത്തെ സര്വ്വീസ് റോഡിന്റെയും മറ്റ് റോഡുകളുടെയും അറ്റകുറ്റപ്പണി നടത്തണം, മുരിങ്ങൂരിലെ ഗതാഗതക്കുരുക്കൊഴിവാക്കാന് കാറുകളടക്കമുള്ള ചെറുവാഹനങ്ങള് തിരിച്ചുവിടണം എന്നിവയാണ് യോഗത്തിലെ നിര്ദ്ദേശങ്ങള്.
