(Photo Courtesy : ANI/X)
യുക്രെയ്നിലെ യുദ്ധം എത്രയും വേഗം അവസാനിപ്പിക്കാൻ ഫ്രഞ്ച് പ്രസിഡന്റ് ഇമ്മാനുവൽ മാക്രോണുമായി ചർച്ച നടത്തി പ്രധാനമന്ത്രി നരേന്ദ്ര മോദി. മാക്രോണുമായുള്ള ആശയവിനിമയത്തെക്കുറിച്ച് പ്രധാനമന്ത്രി തന്നെയാണ് ട്വീറ്റ് ചെയ്തത്.
“വിവിധ മേഖലകളിലെ ഉഭയകക്ഷി സഹകരണത്തിലെ പുരോഗതി ഞങ്ങൾ അവലോകനം ചെയ്യുകയും പോസിറ്റീവായി വിലയിരുത്തുകയും ചെയ്തു. യുക്രെയ്നിലെ സംഘർഷം എത്രയും വേഗം അവസാനിപ്പിക്കുന്നതിനുള്ള ശ്രമങ്ങൾ ഉൾപ്പെടെ അന്താരാഷ്ട്ര, പ്രാദേശിക വിഷയങ്ങളിൽ കാഴ്ചപ്പാടുകൾ കൈമാറി. ആഗോള സമാധാനവും സ്ഥിരതയും വളർത്തുന്നതിൽ ഇന്ത്യ-ഫ്രാൻസ് തന്ത്രപരമായ പങ്കാളിത്തം തുടർന്നും ഒരു പ്രധാന പങ്ക് വഹിക്കും.” പ്രധാനമന്ത്രി പങ്കുവെച്ചു
റഷ്യയ്‌ക്കെതിരെ യുക്രെയ്‌നെ ശക്തിപ്പെടുത്താൻ ലക്ഷ്യമിടുന്ന ഫ്രാൻസും യുകെയും ഉൾപ്പെടെ 31 രാജ്യങ്ങളുടെ കൂട്ടായ്മയായ കോളിഷൻ ഓഫ് ദി വില്ലിംഗും – യുക്രേനിയൻ പ്രസിഡന്റ് വോളോഡിമർ സെലെൻസ്‌കിയും തമ്മിലുള്ള കഴിഞ്ഞയാഴ്ച നടന്ന കൂടിക്കാഴ്ചയുടെ ഫലം മാക്രോൺ പ്രധാനമന്ത്രി മോദിയെ ധരിപ്പിച്ചു.
