വയനാട്ടില്‍ ചൂരല്‍മലയിലുണ്ടായ ഉരുള്‍പ്പൊട്ടലില്‍ കേരളത്തിന് സാന്ത്വനവുമായി പ്രമുഖ വ്യവസായികൾ. വയനാട്ടിലുണ്ടായ ജീവഹാനിയില്‍ അഗാധമായ ദുഖമുണ്ടെന്നും ഈ പ്രതിസന്ധി ഘട്ടത്തില്‍ കേരളത്തോട് ഐക്യദാര്‍ഢ്യപ്പെടുകയാണെന്ന് ഗൗതം അദാനി പറഞ്ഞു. മുഖ്യമന്ത്രിയുടെ ദുരിതാശ്വാസ നിധിയിലേക്ക് അഞ്ച് കോടി സംഭാവന നല്‍കുമെന്നും അദാനി പ്രഖ്യാപിച്ചു.
‘വയനാട്ടിലെ ദാരുണമായ ജീവഹാനിയിൽ അഗാധമായ ദുഃഖം രേഖപ്പെടുത്തുന്നു. ദുരിതബാധിതരായ കുടുംബങ്ങൾക്കായി എന്‍റെ ഹൃദയം വേദനിക്കുന്നു. ഈ പ്രതിസന്ധി ഘട്ടത്തിൽ കേരളത്തിനൊപ്പം ഐക്യദാർഢ്യപ്പെടുകയാണ് അദാനി ഗ്രൂപ്പ്. കേരളത്തിന്‍റെ മുഖ്യമന്ത്രിയുടെ ദുരിതാശ്വാസ നിധിയിലേക്ക് 5 കോടി രൂപ സംഭാവന നൽകി ഞങ്ങൾ വിനയപൂർവ്വം പിന്തുണ നൽകുന്നു,’ അദാനി കുറിച്ചു.
അദാനി ഗ്രൂപ്പിന് പുറമേ ലുലു ഗ്രൂപ്പ് ചെയര്‍മാന്‍ ഡോക്ടര്‍ എം എ യൂസഫലി, പ്രമുഖ വ്യവസായി രവി പിള്ള, കല്യാണ്‍ ജ്വല്ലേഴ്സ് ഉടമ കല്ല്യാണ രാമന്‍ എന്നിവരും അഞ്ച് കോടി രൂപ വീതം ധനസഹായം പ്രഖ്യാപിച്ചിരുന്നു.
