അഹമ്മദാബാദ് : പാക്കിസ്ഥാന് വേണ്ടി ചാരപ്പണി ചെയ്ത ഒരാൾ കൂടി അറസ്റ്റിൽ. കച്ചിലെ നാരായൺ സരോവർ പ്രദേശത്ത് നിന്നാണ് ഇയാളെ ഗുജറാത്ത് എടിഎസ് അറസ്റ്റ് ചെയ്തത്. ഇന്ത്യയിൽ നിന്നുള്ള നിർണ്ണായക വിവരങ്ങൾ ചോർത്തിക്കൊടുത്ത ഗുജറാത്ത് നിവാസിയായ സഹ്ദേവ് സിംഗ് ഗോഹിൽ ആണ് പിടിയിലായത്. പാക്കിസ്ഥാന്റെ ഇന്റർ-സർവ്വീസസ് ഇന്റലിജൻസു (ഐഎസ്ഐ)മായി ഇയാൾ ബന്ധപ്പെട്ടിരുന്നുവെന്നും ഇന്ത്യയുമായി ബന്ധപ്പെട്ട തന്ത്രപ്രധാനമായ വിവരങ്ങൾ കൈമാറ്റം ചെയ്തുവെന്നും റിപ്പോർട്ടുണ്ട്. കൂടുതൽ ചോദ്യം ചെയ്യുന്നതിനായി എടിഎസ് പ്രതിയെ അഹമ്മദാബാദിലേക്ക് കൊണ്ടുവന്നു.
ബിഎസ്എഫുമായും വ്യോമസേനയുമായും ബന്ധപ്പെട്ട വിവരങ്ങൾ സഹ്ദേവ് സിംഗ് ഗോഹിൽ പാക്കിസ്ഥാനുമായി പങ്കുവെച്ചുവെന്നും ആരോപണമുണ്ട്. മെയ് 1 നാണ് പ്രാഥമിക ചോദ്യം ചെയ്യലിനായി അദ്ദേഹത്തെ വിളിപ്പിച്ചത്. അന്വേഷണത്തിനിടെ, 2023 ജൂൺ-ജൂലൈ മാസങ്ങളിൽ വാട്ട്‌സ്ആപ്പിൽ അദിതി ഭരദ്വാജ് എന്ന സ്ത്രീയുമായി ബന്ധപ്പെട്ടതായി ഗോഹിൽ വെളിപ്പെടുത്തി. പിന്നീട് അവർ ഒരു പാക്കിസ്ഥാൻ ഏജന്റാണെന്ന് അയാൾ മനസ്സിലാക്കി. ബിഎസ്എഫ്, ഐഎഎഫ് സൈറ്റുകളുടെ ഫോട്ടോകളും വീഡിയോകളും പങ്കിടാൻ അവർ ആവശ്യപ്പെട്ടു. വാട്ട്‌സ്ആപ്പ് വഴി ഇതിന്റെ ചിത്രങ്ങൾ ഗോഹിൽ അയച്ചു കൊടുത്തതായും വിവരമുണ്ട്.
2025 ന്റെ തുടക്കത്തിൽ, ഗോഹിൽ തന്റെ ആധാർ വിവരങ്ങൾ ഉപയോഗിച്ച് ഒരു സിം കാർഡ് വാങ്ങുകയും ഒരു ഒടിപി ഉപയോഗിച്ച് ഭരദ്വാജിനായി വാട്സ്ആപ്പ് സജീവമാക്കുകയും ചെയ്തുവെന്നാണ് പറയുന്നത്. തുടർന്നുള്ള എല്ലാ ആശയവിനിമയങ്ങളും ഫയൽ ഷെയറിംഗും ആ നമ്പറിലൂടെയാണ് നടന്നത്. ഒരു അജ്ഞാത വ്യക്തി അദ്ദേഹത്തിന് 40,000 രൂപ പണമായി നൽകുകയും ചെയ്തു.
ഭരദ്വാജുമായി ബന്ധിപ്പിച്ചിട്ടുള്ള വാട്ട്‌സ്ആപ്പ് അക്കൗണ്ടുകൾ പാക്കിസ്ഥാനിൽ നിന്നാണ് പ്രവർത്തിക്കുന്നതെന്ന് എസ്പി സിദ്ധാർത്ഥ് കൂട്ടിച്ചേർത്തു. ഗോഹിലിന്റെ ഫോൺ ഫോറൻസിക് സയൻസ് ലബോറട്ടറിയിലേക്ക് അയച്ചിട്ടുണ്ട്, ഗോഹിലിനും പാക്കിസ്ഥാൻ ഏജന്റിനുമെതിരെ ബിഎൻഎസിന്റെ 61, 148 വകുപ്പുകൾ പ്രകാരം കേസ് രജിസ്റ്റർ ചെയ്തു.
ഏപ്രിൽ 22-ന് പഹൽഗാം ഭീകരാക്രമണത്തെത്തുടർന്ന് ചാരപ്രവർത്തനങ്ങൾക്കെതിരെ രാജ്യവ്യാപകമായി നടത്തിയ നടപടിയുടെ ഭാഗമായി, പാക്കിസ്ഥാനു വേണ്ടി ചാരവൃത്തി നടത്തിയെന്നാരോപിച്ച് ട്രാവൽ വ്ലോഗർ ജ്യോതി മൽഹോത്രയുൾപ്പെടെ 11 പേരെ മുൻപ് അറസ്റ്റ് ചെയ്തിരുന്നു. ഹരിയാന, പഞ്ചാബ്, ഉത്തർപ്രദേശ് എന്നീ സംസ്ഥാനങ്ങളിൽ നിന്നുള്ളവരായിരുന്നു ഇവർ.
അതിൽ ഏറ്റവും അവസാനത്തെ അറസ്ററാണ് ഗുജറാത്ത് സ്വദേശിയായ സഹ്ദേവ് സിംഗ് ഗോഹിലിൻ്റേത്.
