കോട്ടയം : നിയമസഭാ തെരഞ്ഞെടുപ്പ് മുന്നിൽ കണ്ട് രാഷ്ട്രീയ പാർട്ടികൾക്ക് മുമ്പിൽ 11 ഇന ആവശ്യങ്ങൾ മുന്നോട്ടുവെച്ച് ചങ്ങനാശ്ശേരി അതിരൂപത. ന്യൂനപക്ഷ ക്ഷേമവകുപ്പ് മുഖ്യമന്ത്രി ഏറ്റെടുക്കണം, ജസ്റ്റിസ് ജെ ബി കോശി കമ്മീഷൻ റിപ്പോർട്ട് പ്രസിദ്ധീകരിക്കണം എന്നിങ്ങനെ പോകുന്നു പ്രമേയത്തിലെ ആവശ്യങ്ങൾ.
ന്യൂനപക്ഷ ക്ഷേമ വകുപ്പ് മുഖ്യമന്ത്രി ഏറ്റെടുക്കണമെന്നതാണ് പ്രമേയത്തിലെ പ്രധാന ആവശ്യം. ന്യൂനപക്ഷ ക്ഷേമ വകുപ്പിലെ 80:20 അനുപാത വിഷയത്തിൽ സുപ്രീംകോടതിയിൽ സംസ്ഥാന സർക്കാർ നൽകിയ അപ്പീൽ പിൻവലിക്കണം. ന്യൂനപക്ഷ കമ്മീഷൻ അദ്ധ്യക്ഷ സ്ഥാനം എല്ലാ ന്യൂനപക്ഷ സമുദായങ്ങൾക്കും വീതിച്ചു നൽകണമെന്നും ചങ്ങനാശ്ശേരി അതിരൂപത പറയുന്നു.
ക്രൈസ്തവരെ സംസ്ഥാനത്തെ മൈക്രോ ന്യൂനപക്ഷമായി അംഗീകരിച്ച് ക്ഷേമ പ്രവർത്തനങ്ങൾ നടപ്പാക്കണമെന്നും ചങ്ങനാശ്ശേരി അതിരൂപത ആവശ്യപ്പെട്ടു. കുട്ടനാടിന് വേണ്ടി പ്രത്യേക പദ്ധതികൾ ആവിഷ്കരിച്ച് നടപ്പാക്കണം. എയ്ഡഡ് വിദ്യാഭ്യാസ മേഖലയിലെ പ്രതിസന്ധികൾ പരിഹരിക്കണം. മതസ്വാതന്ത്ര്യത്തിന് നേരെയുള്ള അക്രമങ്ങളും കടന്നുകയറ്റങ്ങളും അവസാനിപ്പിക്കണമെന്നും പതിനൊന്ന് ഇന ആവശ്യത്തിലുണ്ട്.
ഭൂരിപക്ഷ ന്യൂനപക്ഷ വർഗ്ഗീയ ഭീകരവാദത്തിന് എതിരെ സർക്കാരുകൾ കർശന നടപടിയെടുക്കണമെന്ന് ചങ്ങനാശ്ശേരി അതിരൂപത ആവശ്യപ്പെട്ടു. സമുദായ ദിനാചരണത്തിന്റെ ഭാഗമായി നടന്ന പൊതുസമ്മേളനത്തിലാണ് പ്രമേയം അംഗീകരിച്ചത്.
