കോട്ടയം: കോട്ടയം മെഡിക്കല് കോളേജ് ആശുപത്രിയിലെ കെട്ടിടം തകര്ന്നുവീണ് മരിച്ച ബിന്ദുവിന്റെ വീട് സന്ദർശിച്ച് മന്ത്രി വി.എന്.വാസവൻ.
കുടുംബത്തെ ആശ്വസിപ്പിച്ച മന്ത്രി താത്ക്കാലിക ധനസഹായം ബിന്ദുവിന്റെ അമ്മയ്ക്ക് കൈമാറി. ബിന്ദുവിന്റെ കുടുംബാംഗങ്ങള്ക്ക് ഉചിതമായ സഹായം നല്കുമെന്ന് മുഖ്യമന്ത്രി പിണറായി വിജയന് നേരത്തെ പ്രതികരിച്ചിരുന്നു. ജില്ലാ കലക്ടറും കോളേജ് പ്രിൻസിപ്പലും ആശുപത്രി സൂപ്രണ്ടും മന്ത്രിയോടൊപ്പമുണ്ടായിരുന്നു.
മെഡിക്കല് കോളേജിന്റെ എച്ച്ഡിഎസ് ഫണ്ടില്നിന്നുള്ള 50000 രൂപയാണ് അടിയന്തരമായി കുടുംബത്തിന് മന്ത്രി കൈമാറിയത്. മന്ത്രിസഭാ യോഗത്തിന് ശേഷം സര്ക്കാരിന്റെ ധനസഹായം നല്കുമെന്നും അദ്ദേഹം വ്യക്തമാക്കി. ”നാല് കാര്യങ്ങളാണ് കുടുംബം മുന്നോട്ട് വെച്ചത്. ബിന്ദുവിന്റെ മകളുടെ ചികിത്സയാണ് കുടുംബം മുന്നോട്ട് വെച്ച പ്രധാന കാര്യങ്ങളിലൊന്ന്. അത് പൂര്ണ്ണമായും സര്ക്കാര് സൗജന്യമായി ഉറപ്പാക്കും. മകന് താത്കാലി ജോലി നല്കാനും തീരുമാനിച്ചു. സ്ഥിര ജോലി സംബന്ധിച്ച് പിന്നീട് തീരുമാനിക്കും. കുടുംബം മുന്നോട്ട് വെച്ച മറ്റു രണ്ട് കാര്യങ്ങൾ സാമ്പത്തിക ധനസഹായമാണ്. താത്ക്കാലിക ധനസഹായം ഇപ്പോള് നല്കി. വലിയ ധനസഹായം മന്ത്രിസഭ ചേര്ന്ന് തീരുമാനിക്കും.” – മന്ത്രി അറിയിച്ചു.
