തിരുവനന്തപുരം : സ്കൂള് സമയമാറ്റത്തില് പുനഃരാലോചനയില്ലെന്ന് ആവര്ത്തിച്ച് വിദ്യാഭ്യാസമന്ത്രി വി. ശിവന്കുട്ടി. ആശയക്കുഴപ്പങ്ങള് ഒഴിവാക്കാനാണ് ചര്ച്ച നടത്തുന്നതെന്നും സമസ്തയുമായി മാത്രമല്ല, സംശയമുള്ള എല്ലാവരുമായും ചര്ച്ചയ്ക്ക് തയ്യാറാണെന്നും മന്ത്രി പറഞ്ഞു. തിരുവനന്തപുരത്ത് നടത്തിയ വാര്ത്താസമ്മേളനത്തിലാണ് മന്ത്രി ഇക്കാര്യം വ്യക്തമാക്കിയത്. സമസ്ത കേരള ജംഇയ്യത്തുല് ഉലമ ഉള്പ്പെടെയുള്ള സംഘടനകള് സ്കൂള് സമയമാറ്റത്തിനെതിരെ പ്രക്ഷോഭത്തിനൊരുങ്ങവെയാണ് മന്ത്രിയുടെ ഈ വാക്കുകള്.
”എട്ട്, ഒമ്പത്, 10 ക്ലാസുകളിലെ കാര്യംമാത്രമാണ് നമ്മള് സംസാരിക്കുന്നത്. സര്ക്കാര് എന്തുകാര്യം പറഞ്ഞാലും അതിനെ ദുഷ്ടലാക്കോടെ മാത്രം കാണുന്നത് ശരിയല്ല. കാര്യങ്ങള് മനസിലാക്കാതെ സമരം പ്രഖ്യാപിക്കുക എന്നൊക്കെ പറഞ്ഞാല് അംഗീകരിക്കാനാവില്ല.” മന്ത്രി പറഞ്ഞു.
കേരളത്തില് തന്നെ സിബിഎസ്ഇ, ഐസിഎസ്ഇ സിലബസുകളില് പ്രവര്ത്തിക്കുന്ന സ്കൂളുകളും സര്ക്കാര് അംഗീകാരമില്ലാതെ പ്രവര്ത്തിക്കുന്ന സ്കൂളുകളും അവരുടെ അക്കാദമി നിലവാരം ഉയര്ത്തുന്നതിന്റെ ഭാഗമായി പ്രവൃത്തി ദിനങ്ങള് അടക്കം ഉയര്ത്തിയിട്ടുണ്ട്. അക്കാര്യങ്ങള് കൂടി പരിഗണിക്കുമ്പോള് ദേശീയ അടിസ്ഥാനത്തില് തന്നെ മാതൃകാപരമായി പോകുന്ന കേരളത്തിന്റെ പൊതുവിദ്യാഭ്യാസ മേഖലയെ തകര്ക്കാന് ഏതെങ്കിലും വിധത്തിലുള്ള ഗൂഢാലോചന നടക്കുന്നുണ്ടോ എന്ന് സംശയിക്കുന്നു. പ്രതിഷേധങ്ങള്ക്ക് പിന്നിലെ ലക്ഷ്യം സംശയാസ്പദമാണെന്നും മന്ത്രി പറഞ്ഞു
