ന്യൂഡല്ഹി: ഘടകക്ഷികളുടെ സമ്മര്ദ്ദമാകാം മൂന്നാം മോദി സര്ക്കാരിന്റെ ആദ്യ ബജറ്റില് ആന്ധ്രയ്ക്കും ബിഹാറിനും കൈനിറയെ പദ്ധതികള് ലഭിച്ചു. ധനമന്ത്രി നിര്മലാ സീതാരാമന് അവതരിപ്പിച്ച ബജറ്റില് ബിഹാര്, ആന്ധ്ര, ഒഡീഷ സംസ്ഥാനങ്ങള്ക്കായി പ്രത്യേക പദ്ധതികളുണ്ട്. ബിഹാര്, ഝാര്ഖണ്ഡ്, പശ്ചിമബംഗാള്, ഒഡിഷ, ആന്ധപ്രദേശ് സംസ്ഥാനങ്ങള്ക്കായി പൂര്വോദയ പദ്ധതി പ്രഖ്യാപിച്ചിട്ടുണ്ട്.
അടിസ്ഥാന സൗകര്യവികസനത്തിന് ബിഹാറിന് കൂടുതല് ധനസഹായം പ്രഖ്യാപിച്ചിട്ടുണ്ട്. പുതിയ വിമാനത്താവളങ്ങള്, മെഡിക്കല് കോളേജുകള്, കായിക സ്ഥാപനങ്ങള് എന്നിവ ബിഹാറില് നിര്മിക്കും. ബിഹാറില് ദേശീയ പാത വികസനത്തിന് 26,000 കോടി രൂപയാണ് അനുവദിച്ചത്. ബിഹാറിന് വെള്ളപ്പൊക്ക പ്രതിരോധത്തിനായി 11,500 കോടി അനുവദിച്ചു.ബിഹാറില് രണ്ട് ക്ഷേത്ര ഇടനാഴിക്ക് പദ്ധതി. നളന്ദ സര്വകലാശാലയുടെ വികസനത്തിന് മുന്ഗണന നല്കും. പട്ന പൂര്ണിയ, ബക്സര് ബദല്പുര്, ബോധ്ഗയ വൈശാലി എന്നീ മൂന്ന് എക്സ്പ്രസ് വേകളും ബിഹാറില് പ്രഖ്യാപിച്ചു. ആന്ധ്രപ്രദേശില് അമരാവതിയില് തലസ്ഥാന നഗര വികസനത്തിന് 15,000 കോടിയുടെ പ്രത്യേക സാമ്പത്തിക സഹായമാണ് ബജറ്റിലുള്ളത്. ആന്ധ്രയുടെ പിന്നാക്കമേഖലയുടെ വികസനത്തിന് സാമ്പത്തിക സഹായവുമുണ്ട്. വന് പദ്ധതികളും ഫണ്ടും ഉള്പ്പെടെ സംസ്ഥാനങ്ങള്ക്ക് ബജറ്റില് കോളടിച്ചു. അമൃത്സര്-കൊല്ക്കത്ത വ്യവസായ ഇടനാഴിയില് ബിഹാറിലെ ഗയയിലെ വ്യവസായ പദ്ധതി, ഹൈദരബാദ്-ബെംഗളൂരു വ്യവസായ ഇടനാഴി, വിശാഖപട്ടണം വ്യവസായ ഇടനാഴി തുടങ്ങിയവയില് വമ്പന് പദ്ധതികളും ബജറ്റിലുണ്ട്.
