ഹൈദരബാദ്: അശ്വിന്-പ്രഭാസ് ടീമിന്റെ ‘കല്ക്കി 2898 എഡി’ 1100 കോടി രൂപ കളക്ഷന് നേടിയതായി നിര്മ്മാതാക്കളായ വൈജയന്തി മൂവീസ്. ജൂണ് 27ന് പുറത്തിറങ്ങിയ ചിത്രം ഇപ്പോഴും തിയേറ്ററില് പ്രദർശനം തുടരുകയാണ്. ഓപ്പണിംഗ് ദിനത്തില് തന്നെ ചിത്രം 191 കോടി രൂപയാണ് ബോക്സ് ഓഫീസില് നിന്നും നേടിയത്. ഈ വര്ഷം 1000 കോടി ക്ലബ്ബ് എന്ന നേട്ടത്തിലെത്തുന്ന ആദ്യത്തെ ചിത്രമെന്ന നേട്ടവും കല്ക്കി സ്വന്തമാക്കി. കഴിഞ്ഞ വര്ഷം ഷാരൂഖ് ഖാന് നായകനായെത്തിയ ജവാന്, പഠാന് എന്നീ ചിത്രങ്ങള് 1000 കോടി ക്ലബ്ബില് ഇടം നേടിയിരുന്നു.
ഇന്ത്യന് പുരാണങ്ങളില് നിന്ന് പ്രചോദനം ഉള്ക്കൊണ്ട് ഭാവിയെ തുറന്നുകാണിക്കുന്ന സയന്സ് ഫിക്ഷനാണ് കല്ക്കി 2898 എഡി. കാശി, കോംപ്ലക്സ്, ശംഭാള എന്നീ മൂന്ന് ലോകങ്ങളുടെ കഥ പറയുന്ന ചിത്രത്തില് 3101ലെ മഹാഭാരതത്തിന്റെ ഇതിഹാസ സംഭവങ്ങള് മുതല് എഡി 2898 സഹസ്രാബ്ദങ്ങള് വരെ നീണ്ടുനില്ക്കുന്ന യാത്രയാണ് ചിത്രത്തില് ദൃശ്യാവിഷ്കരിച്ചിരിക്കുന്നത്.
കൽക്കിയിൽ ദുൽഖർ സൽമാൻ
പ്രഭാസിനെ കൂടാതെ അമിതാഭ് ബച്ചന്, ദീപിക പദുക്കോണ്, കമല് ഹാസന്, ശോഭന തുടങ്ങി വന് താരനിരയാണ് ചിത്രത്തിലുള്ളത്. കൂടാതെ വിജയ് ദേവരകൊണ്ട, ദുല്ഖര് സല്മാന്, രാജമൗലി, രാം ഗോപാല് വര്മ്മ എന്നിവര് കാമിയോ റോളുകളിലും എത്തിയിരുന്നു. തെലുങ്ക്, തമിഴ്, മലയാളം, ഹിന്ദി, കന്നഡ തുടങ്ങി അഞ്ച് ഭാഷകളിലായാണ് ചിത്രം തിയേറ്ററിലെത്തിയത്.
തെലുങ്ക്, മലയാളം, തമിഴ്, കന്നഡ പതിപ്പുകള് ആമസോണ് പ്രൈമില് ലഭ്യമാകും. അതേസമയം ചിത്രത്തിന്റെ ഹിന്ദി പതിപ്പ് ഇംഗ്ലീഷ് സബ്ടൈറ്റിലുകളോട് നെറ്റ്ഫ്ലിക്സില് മാത്രമായിരിക്കും സംപ്രേഷണം ചെയ്യുക. ജൂണ് 27ന് തിയേറ്ററുകളിലെത്തിയ ചിത്രം ജൂലൈയില് തന്നെ ഒ.ടി.ടിയില് എത്തിക്കാന് ആയിരുന്നു ആദ്യം തീരുമാനിച്ചിരുന്നത്.
എന്നാല് ചിത്രം കാണാന് തിയേറ്ററുകളിലേക്ക് ഇപ്പോഴും പ്രേക്ഷകര് എത്തുന്നതിനാലാണ് ഒ.ടി.ടി റിലീസ് മാറ്റിവച്ചത്. സെപ്റ്റംബര് രണ്ടാം വാരത്തോട് കൂടി ചിത്രം ഒ.ടി.ടിയില് എത്തുമെന്നാണ് റിപ്പോര്ട്ടുകള്. 600 കോടി മുതല് മുടക്കില് നിര്മ്മിച്ച ചിത്രം ഇന്ത്യയിലെ ഏറ്റവും ചെലവേറിയ ചിത്രങ്ങളില് ഒന്നാണ്.
