തൃശൂർ: യു.ആർ. പ്രദീപ്കുമാർ ചേലക്കരയിൽ എൽഡിഎഫ് സ്ഥാനാർഥിയാകും. ശനിയാഴ്ച ഇത് സംബന്ധിച്ച് ഔദ്യോഗിക തീരുമാനമുണ്ടാകും. 2016ൽ ജയിച്ച് നിയമസഭയിലെത്തിയ പ്രദീപ് കുമാർ രണ്ടാം തവണയാണ് ചേലക്കരയിൽ ജനവിധി തേടുന്നത്.
ആലത്തൂരിൽ നിന്ന് ലോക്‌സഭയിലേക്ക് തെരഞ്ഞെടുക്കപ്പെട്ടതിനെ തുടർന്ന് കെ.രാധാകൃഷ്ണൻ രാജിവെച്ചതിനെ തുടർന്നാണ് ചേലക്കരയിൽ ഉപതെരഞ്ഞെടുപ്പ് വേണ്ടിവന്നത്. . കെ.രാധാകൃഷ്ണൻ അഞ്ച് തവണ ചേലക്കരയെ പ്രതിനിധീകരിച്ചിട്ടുണ്ട്. ഇത്തവണയും മികച്ച ഭൂരിപക്ഷത്തിൽ എൽഡിഎഫ് വിജയിക്കുമെന്ന ആത്മവിശ്വാസത്തിലാണ് സിപിഎം ജില്ലാ സെക്രട്ടറി എം.എം. വർഗീസ്.
രമ്യാ ഹരിദാസിനെ യു.ഡി.എഫ് സ്ഥാനാർത്ഥിയായി നേരത്തെ പ്രഖ്യാപിച്ചിരുന്നു. ബിജെപി സ്ഥാനാർത്ഥിയെയും വരും ദിവസങ്ങളിൽ പ്രഖ്യാപിക്കും. ചേലക്കര, കൊണ്ടാഴി, തിരുവില്വാമല, പഴയന്നൂർ, പാഞ്ഞാൾ, വള്ളത്തോൾ നഗർ, മുള്ളൂർക്കര, ദേശമംഗലം, വരവൂർ എന്നീ ഒൻപത് പഞ്ചായത്തുകൾ ഉൾപ്പെടുന്ന ചേലക്കര നിയോജകമണ്ഡലം 1965 – ലാണ് രൂപീകൃതമായത്.
