വയനാട്: ഉപതെരഞ്ഞെടുപ്പ് നടക്കുന്ന വയനാട് ലോക സഭാ മണ്ഡലത്തിൻ കോണ്ഗ്രസ് സ്ഥാനാര്ത്ഥിയായി നാമനിര്ദേശ പത്രിക സമര്പ്പിച്ച് പ്രിയങ്കാഗാന്ധി’. മൂന്ന് സെറ്റ് പത്രികയാണ് പ്രയങ്ക സമര്പ്പിച്ചത്. സോണിയ ഗാന്ധിയും രാഹുല് ഗാന്ധിയും ഭര്ത്താവ് റോബർട്ട് വദ്രയും മകനും കൂടാതെ കോൺഗ്രസ് അധ്യക്ഷൻ മല്ലികാർജുന ഖർഗെ, എഐസിസി ജനറല് സെക്രട്ടറി കെ സി വേണുഗോപാൽ തുടങ്ങിയ ഒരു വമ്പൻ നേതാക്കളുടെ നിര തന്നെ പ്രിയങ്ക ഗാന്ധിക്കൊപ്പം കളക്ടേറ്റില് എത്തിയിരുന്നു. വയനാട്ടിൽ മത്സരിക്കാനാവുന്നതിൽ സന്തോഷമെന്നും ജനം തന്നെ തെരഞ്ഞെടുത്താൽ ഭാഗ്യമായി കരുതുമെന്നും നാമനിർദ്ദേശ പത്രിക സമർപ്പിച്ച് പ്രിയങ്ക ഗാന്ധി മാധ്യമങ്ങളോട് പ്രതികരിച്ചു.
ആവേശം അലയടിച്ചു റോഡ് ഷോക്ക് പിറകെയാണ് പ്രിയങ്ക ഗാന്ധി നാമനിര്ദേശ പത്രിക സമര്പ്പിച്ചത്. വയനാടിനെ കൈവിടില്ലെന്നും ഏത് സങ്കടത്തിലും സന്തോഷത്തിലും ഒപ്പമുണ്ടാകുമെന്നും പ്രിയങ്ക ഗാന്ധി വോട്ടര്മാരെ അഭിസംബോധന ചെയ്ത് പറഞ്ഞു. ഇത് എന്റെ പുതിയ യാത്രയാണ്. ഇതിൽ നിങ്ങൾ ഓരോരുത്തരുമാണ് ഗുരുക്കൻമാരാണ്. രാഹുലിന് പോരാടാനുള്ള കരുത്ത് നൽകിയത് വയനാടാണ്. എന്റെ കുടുംബം വയനാടിനോട് എക്കാലവും കടപ്പെട്ടിരിക്കുന്നുവെന്നും പ്രിയങ്ക ഗാന്ധി കൂട്ടിച്ചേര്ത്തു.
രാഹുൽ ഗാന്ധി, സോണിയ ഗാന്ധി, മല്ലികാര്ജുൻ ഖര്ഗെ, കര്ണാടക മുഖ്യമന്ത്രി സിദ്ധരാമയ്യ, പ്രതിപക്ഷ നേതാവ് വിഡി സതീശൻ, കെപിസിസി അധ്യക്ഷൻ കെ സുധാകരൻ, പികെ കുഞ്ഞാലിക്കുട്ടി, പാണക്കാട് സാദിഖ് അലി ശിഹാബ് തങ്ങള്, മറ്റു കോണ്ഗ്രസ് നേതാക്കള് തുടങ്ങിയ നിരവധി പേര് കല്പ്പറ്റയിലെ പൊതുപരിപാടിയിൽ പങ്കെടുത്തു.
