കൽപ്പറ്റ : വയനാട്ടിൽ ആത്മഹത്യ ചെയ്ത കെപിസിസി ട്രഷറർ എൻ എം വിജയന്റെ കുടുംബത്തെ അനുനയിപ്പിച്ച് കെപിസിസി. തിരുവഞ്ചൂർ രാധാകൃഷ്ണന്റെ നേതൃത്വത്തിലുള്ള സംഘം. കുടുംബത്തിന്റെ എല്ലാ പ്രശ്നവും പരിഹരിക്കുമെന്ന് തിരുവഞ്ചൂർ രാധാകൃഷ്ണൻ മാധ്യമങ്ങളോട് പറഞ്ഞു. പ്രയാസങ്ങളെല്ലാം മാറിയെന്ന് കുടുംബാംഗങ്ങൾ പ്രതികരിച്ചെങ്കിലും നിലവിലെ അന്വേഷണം നടക്കട്ടെയെന്നാണ് കുടുംബത്തിൻ്റെ നിലപാട്
തുടക്കത്തിൽ പാർട്ടി നന്നായി ഇടപെട്ടിരുന്നെങ്കിൽ പ്രശ്നം ഇത്രത്തോളം വഷളാകില്ലായിരുന്നു. അച്ഛൻ വിശ്വസിച്ച പാർട്ടിയുടെ ഉറപ്പ് വിശ്വാസത്തിലെടുക്കുന്നു. കടബാദ്ധ്യത പാർട്ടിയുടേതെന്ന് നേതാക്കന്മാർ അംഗീകരിച്ചുവെന്നും കുടുംബം. കുടുംബത്തെ ഒപ്പം നിർത്തി പ്രശ്നങ്ങൾ പരിഹരിച്ചുവെന്ന് കോൺഗ്രസ് നേതാക്കന്മാർ. കുടുംബത്തെ ആശ്വസിപ്പിക്കുകയാണ് തങ്ങളുടെ പ്രധാന പരിഗണനയെന്നും കുടുംബത്തിന് വേണ്ടതെല്ലാം ചെയ്യുമെന്നും തിരുവഞ്ചൂർ.
വിഷയത്തിൽ പരസ്യ പ്രസ്താവന ഉണ്ടാകരുതെന്ന് നേതാക്കന്മാർക്ക് കർശന നിർദ്ദേശം നൽകി. രാഷ്ട്രീയ മുതലെടുപ്പിന് അവസരമാക്കി വിഷയത്തെ മാറ്റാൻ അനുവദിക്കില്ലെന്നും തിരുവഞ്ചൂർ പറഞ്ഞു. കെ സുധാകരനും വി ഡി സതീശനും കുടുംബത്തെ നേരിൽ കാണുമെന്നാണ് നേതാക്കൾ നൽകുന്ന വിവരം. വയനാട്ടിൽ എത്തുമ്പോൾ പ്രിയങ്ക ഗാന്ധിയും കുടുംബത്തെ കണ്ടേക്കും.
പാർട്ടി നൽകുന്ന ഉറപ്പിൽ പരാതിയിൽ നിന്ന് വിജയൻ്റെ കുടുംബം പിന്മാറുന്നതോടെ വയനാട്ടിലെ കോൺഗ്രസ് നേതാക്കളായ എൻഡി അപ്പച്ചനും ഐസി ബാലകൃഷ്ണനുമാണ് ഏറെ ആശ്വാസമാകുന്നത്. അന്വേഷണത്തിൽ നിന്ന് തടിയൂരാനും സിപിഎമ്മിൻ്റെ പ്രതിഷേധത്തിന് തടയിടാനും അനുനയശ്രമങ്ങൾ ഗുണം ചെയ്തേക്കും.
