ന്യൂഡൽഹി : ദില്ലിയിൽ പുതിയ മന്ത്രിസഭയുടെ സത്യപ്രതിജ്ഞ ശനിയാഴ്ച്ച നടക്കും. രണ്ട് മന്ത്രിമാർ ഉൾപ്പെടെ ഏഴ് പേരാകും ആതിഷിക്കൊപ്പം സത്യപ്രതിജ്ഞ ചെയ്യുക. എന്നാൽ ഉപമുഖ്യമന്ത്രി സ്ഥാനം ഇക്കുറി ഉണ്ടാവില്ല.
മന്ത്രിസഭയിൽ വലിയ മാറ്റങ്ങൾക്ക് സാദ്ധ്യതയില്ല. . ആതിഷിക്കൊപ്പം നിലവിലെ മന്ത്രിമാരായ സൌരഭ് ഭരദ്വാജ്, ഗോപാൽ റായ്, കൈലാഷ് ഗെലോട്ട്, ഇമ്രാൻ ഹുസൈൻ,എന്നിവരെ നിലനിർത്തുമെന്നാണ് വിവരം. മുഖ്യമന്ത്രിയായി സത്യപ്രതിജ്ഞ ചെയ്യുന്ന ആതിഷിക്ക് ധനകാര്യം, വിദ്യാഭ്യാസം ഉൾപ്പെടെ 14 വകുപ്പുകളുടെ ചുമതല ഉണ്ടാകും.
മുൻ എഎപി നേതാവ് രാജ് കുമാർ ആനന്ദ് രാജി വെച്ചതോടെ ദളിത് പ്രാതിനിധ്യം മന്ത്രിസഭയിലില്ല. ഈ സ്ഥാനത്തേക്ക് യുവനേതാവ് കുൽദീപ് കുമാർ, രാഖി ബിർള എന്നിവരുടെ പേരുകൾ ഉയർന്നുവന്നിട്ടുണ്ട് . സഞ്ജയ് ഝാ,ദുർഗേഷ് പഥക് എന്നിവരുടെ പേരുകളും പരിഗണനയിലുണ്ട്. കഴിഞ്ഞ സർക്കാരിൽ മന്ത്രിമാർ കൈകാര്യം ചെയ്തിരുന്ന വകുപ്പുകളിൽ വലിയ മാറ്റങ്ങൾക്കും സാധ്യതയില്ല. അടുത്ത വർഷം നടക്കുന്ന ദില്ലി തെരഞ്ഞെടുപ്പിന് മുമ്പ് സർക്കാരിൻറെ പ്രതിഛായ വീണ്ടെടുക്കുക എന്നതായിരിക്കും ആതിഷി മന്ത്രിസഭയുടെ ഉത്തരവാദിത്വം. പുതിയ മന്ത്രിസഭ അധികാരം ഏറ്റെടുക്കുന്ന വേളയിൽ ചില ജനകീയ പ്രഖ്യാപനങ്ങൾ പ്രതീക്ഷിക്കാം.
