കൊച്ചി: പൂരം അലങ്കോലപ്പെടുത്തിയതിൽ എ.ഡി.ജി.പിയുടെ വീഴ്ചയടക്കം സമഗ്ര അന്വേഷണം നടക്കുന്നുണ്ടെന്നും എഡിജിപി എച്ച് വെങ്കിടേഷിന്റെ നേതൃത്വത്തില് പ്രത്യേക അന്വേഷണ സംഘത്തെ സംഭവവുമായി ബന്ധപ്പെട്ട് നിയോഗിച്ചിട്ടുണ്ടെന്നും വ്യക്തമാക്കി സർക്കാർ ഹൈക്കോടതിയിൽ. സത്യവാങ്മൂലത്തിലാണ് ആഭ്യന്തര വകുപ്പ് ഇക്കാര്യം കോടതിയെ ബോദ്ധ്യപ്പെടുത്തിയത്.
ജനങ്ങളുടെ സുരക്ഷ കണക്കിലെടുത്തുകൊണ്ട് പൂരം ഭംഗിയായി നടത്തുക എന്നത് മാത്രമായിരുന്നു സര്ക്കാരിന്റെ ലക്ഷ്യമെന്നും ഉദ്യോഗസ്ഥ തല വീഴ്ചയുണ്ടായെന്ന് കണ്ടെത്തിയാൽ കര്ശന നടപടി സ്വീകരിക്കുമെന്നും സര്ക്കാർ കോടതിയെ അറിയിച്ചു.
ചുമതലയിലുണ്ടായിരുന്ന എ.ഡി.ജി.പി പ്രശ്ന പരിഹാരത്തിനായി ഇടപെടാതിരുന്നത് വീഴ്ചയാണെന്ന് ഡി.ജി.പി അറിയിച്ചിരുന്നു. എ.ഡി.ജി.പിയുടെ വീഴ്ചയടക്കം അന്വേഷിക്കുന്നുണ്ട്. 3500 പോലീസുകാർ സുരക്ഷയ്ക്കായി ഉണ്ടായിരുന്നു. പൂരം അലങ്കോലപ്പെടുത്തലിലെ സത്യം പുറത്തു കൊണ്ട് വന്ന് ഉചിത നടപടി സ്വീകരിക്കുമെന്നും സർക്കാർ സത്യവാങ്മൂലത്തിൽ വ്യക്തമാക്കുന്നു.
