ന്യൂഡൽഹി : എഐ ഉച്ചകോടിയില് പ്രതിഷേധിച്ച യൂത്ത് കോൺഗ്രസ് ദേശീയ അദ്ധ്യക്ഷൻ ഉദയ് ഭാനു ചിബ് അറസ്റ്റിൽ. തിങ്കളാഴ്ച രാത്രി മുതൽ ചിബിനെ പോലീസ് ചോദ്യം ചെയ്തിരുന്നു. ഇതുവരെ കേസിൽ 7 പേരാണ് അറസ്റ്റിലായത് യൂത്ത്കോൺഗ്രസ് അധ്യക്ഷൻ്റെ അറസ്റ്റോടെ പ്രധാനമന്ത്രിയുടെ ബ്ലാക്ക്മെയിൽ വ്യക്തമായെന്ന് കോൺഗ്രസ് വക്താവ് പവൻ ഖേര പ്രതികരിച്ചു. ഒരാൾ അറസ്സിലായാലും ആയിരങ്ങൾ പ്രതിഷേധിക്കും. പ്രധാനമന്ത്രി അമേരിക്കക്ക് കീഴടങ്ങി കഴിഞ്ഞു. സ്വകാര്യ സർവ്വകലാശാലയുടെ പേരിൽ ഉച്ചകോടി നാറിക്കഴിഞ്ഞു. യൂത്ത് കോൺഗ്രസ് പ്രതിഷേധത്തിന് മുൻപെ ഉച്ചകോടിയുടെ ശോഭ കെട്ടിരുന്നെന്നും പവൻ ഖേര പറഞ്ഞു
എഐ ഉച്ചകോടിയിലെ യൂത്ത് കോണ്ഗ്രസ് പ്രതിഷേധത്തിൽ കോണ്ഗ്രസിനെതിരെ തുറന്നടിച്ച് പ്രധാനമന്ത്രി നരേന്ദ്ര മോദി രംഗത്ത് വന്നിരുന്നു. ഷർട്ട് ഊരിയില്ലെങ്കിലും കോണ്ഗ്രസ് നഗ്നമാണെന്ന് പ്രധാനമന്ത്രി പരിഹസിച്ചു. എഐ ഉച്ചകോടി അലങ്കോലമാക്കാനാണ് ശ്രമിച്ചതെന്നും കോണ്ഗ്രസ് വൃത്തികെട്ട രാഷ്ട്രീയമാണ് കളിക്കുന്നതെന്നും മോദി വിമർശിച്ചു
യുപിയിലെ മീററ്റിൽ അതിവേഗ റെയിൽപ്പാതയടക്കം ഉദഘാടനം ചെയ്ത് സംസാരിക്കുന്നതിനിടെയാണ് എഐ സമ്മേളനത്തിൽ യൂത്ത് കോൺഗ്രസ് നടത്തിയ ഷർട്ടൂരി പ്രതിഷേധത്തിനെതിരെ പ്രധാനമന്ത്രി ആഞ്ഞടിച്ചത്. .ലോകത്തിന് മുന്നിൽ ഇന്ത്യയുടെ അഭിമാനം ഉയർത്തിയ പരിപാടിയായിരുന്നു എഐ സമ്മേളനം. ആ പരിപാടിയിൽ ലോക നേതാക്കള്ക്ക് മുന്നിൽ ഷര്ട്ടൂരി ഇന്ത്യയെ കോണ്ഗ്രസ് നാണം കെടുത്തി. മോദിയോടും എൻഡിഎയോടും വിരോധമാകാം. എന്നാൽ, എഐ സമ്മേളനം രാജ്യത്തിന്റെ പരിപാടിയാണ്. അതിൽ പോലും മര്യാദ കാണിക്കാൻ കോൺഗ്രസ് ശ്രമിച്ചില്ലെന്നും പ്രധാനമന്ത്രി കുറ്റപ്പെടുത്തി.
