തിരുവനന്തപുരം: ലൈംഗിക ചൂഷണ ആരോപണങ്ങള് നേരിട്ട് വിവാദത്തിലായ രാഹുല് മാങ്കൂട്ടത്തിൽ എംഎല്എയെ വീണ്ടും ചോദ്യം ചെയ്യാനൊരുങ്ങി ക്രൈംബ്രാഞ്ച്. യൂത്ത് കോൺഗ്രസ് തെരഞ്ഞെടുപ്പിലെ വ്യാജ തിരിച്ചറിയൽ കാർഡ് കേസിലാണ് രാഹുലിനെ ക്രൈംബ്രാഞ്ച് ചോദ്യം ചെയ്യുക. ശനിയാഴ്ച ഹാജരാക്കാൻ രാഹുലിന് ക്രൈംബ്രാഞ്ച് നോട്ടീസ് അയച്ചു.
പ്രതികളുടെ ശബ്ദരേഖയിൽ രാഹുല് മാങ്കൂട്ടത്തിലിൻ്റെ പേരുമുണ്ട്. ഇതോടെയാണ് വീണ്ടും ചോദ്യം ചെയ്യാനുള്ള തീരുമാനം. മൂന്നാം പ്രതി അഭിനന്ദ് വിക്രമിൻ്റെ ഫോണിലെ ശബ്ദരേഖയിലാണ് രാഹുലിൻ്റെ പേര് പരാമർശിക്കുന്നത്. കേസില് നിലവില് ഏഴ് പ്രതികളാണുള്ളത്.
വ്യാജ തിരിച്ചറിയൽ രേഖ കേസില് രാഹുലിനെ നേരത്തെ പോലീസ് ആദ്യത്തെ ചോദ്യം ചെയ്തിരുന്നെങ്കിലും ആരോപണങ്ങള് നിഷേധിക്കുകയായിരുന്നു. കേസിൽ അറസ്റ്റിലായ പ്രതികളുമായി ബന്ധമുണ്ടെങ്കിലും അവർ വ്യാജ രേഖയുണ്ടായതായി അറിയില്ലെന്നും അത്തരത്തില് വോട്ടുകള് ലഭിച്ചിട്ടില്ലെന്നുമായിരുന്നു രാഹുലിന്റെ മൊഴി. അതേസമയം, സംഘടനാ തെരഞ്ഞെടുപ്പിൽ വ്യാപകമായി വ്യാജ കാർഡുകള് ഉപയോഗിച്ചുവെന്ന് തെരഞ്ഞെടുപ്പ് കമ്മീഷന് പോലീസ് റിപ്പോർട്ട് നൽകിയിട്ടുണ്ട്.
