കൊച്ചി: പാതിവില സ്കൂട്ടർ തട്ടിപ്പ് അന്വേഷണത്തിൽ എൻഫോഴ്സ്മെന്റ് ഡയറക്ടറേറ്റും (ഇഡി) രംഗത്ത്. ഇതുമായി ബന്ധപ്പെട്ട് 12 ഇടങ്ങളിൽ ഇഡിയുടെ റെയ്ഡ് പുരോഗമിക്കുകയാണ്. കേസിലെ ഒന്നാംപ്രതി അനന്തുകൃഷ്ണൻ, സത്യസായി ട്രസ്റ്റ് എക്സിക്യുട്ടീവ് ഡയറക്ടർ കെ.എൻ. ആനന്ദകുമാർ എന്നിവരുടെ സ്ഥാപനങ്ങളിലും വീടുകളിലും കോൺഗ്രസ് നേതാവ് ലാലി വിൻസെന്റിന്റെ കൊച്ചിയിലെ വസതിയിലുമാണ് പരിശോധന നടക്കുന്നത്.
ചൊവ്വാഴ്ച പുലർച്ചെ മുതലാണ് കൊച്ചിയിൽനിന്നുള്ള അറുപതോളം ഉദ്യോഗസ്ഥർ വിവിധ സംഘങ്ങളായി തിരിഞ്ഞ് റെയ്ഡ് ആരംഭിച്ചത്. കള്ളപ്പണ, ചൂതാട്ടവിരുദ്ധ നിയമത്തിന്റെ അടിസ്ഥാനത്തിൽ കേസെടുത്ത ഇഡി കഴിഞ്ഞ ദിവസം പരാതിക്കാരിൽനിന്ന് വിശദമായ മൊഴിയെടുക്കുകയും ചെയ്തിരുന്നു. 159 കോടി രൂപയുടെ ഇടപാട് മൊത്തത്തിൽ നടന്നുവെന്നാണ് ഇഡിയുടെ പ്രാഥമികാന്വേഷണത്തിൽ കണ്ടെത്തിയിരിക്കുന്നത്.
പാതിവിലയിൽ സ്ക്കൂട്ടർ ഉൾപ്പടെ നൽകാമെന്ന് പറഞ്ഞ് സാധാരണക്കാരിൽ നിന്ന് പിരിച്ചെടുത്ത പണം, കള്ളപ്പണമായി പലർക്കും കൈമാറിയിട്ടുണ്ടെന്ന കണ്ടെത്തലിന്റെ അടിസ്ഥാനത്തിലാണ് ഇഡി അന്വേഷണവുമായി മുന്നിട്ടിറങ്ങിയത്.
സ്കൂട്ടര് തട്ടിപ്പുകേസിലെ മുഖ്യപ്രതി അനന്തുകൃഷ്ണന് കോണ്ഗ്രസ് നേതാവ് ലാലി വിന്സെന്റിന് 46 ലക്ഷം രൂപ കൈമാറിയെന്ന് പോലീസ് നേരത്തെ കണ്ടെത്തിയിരുന്നു. സംസ്ഥാന വ്യാപകമായി നടന്ന വന്തട്ടിപ്പില് പോലീസ് നടത്തിയ വിശദമായ അന്വേഷണത്തിലാണ് ഇത്രയുംവലിയ തുക കോണ്ഗ്രസ് നേതാവ് കൈപ്പറ്റിയതായി വ്യക്തമായത്.
തട്ടിപ്പില് തനിക്ക് പങ്കില്ലെന്നും അനന്തുകൃഷ്ണന് തനിക്ക് നല്കിയത് അഭിഭാഷകഫീസാണെന്നും ലാലി വിന്സെന്റ് പറഞ്ഞിരുന്നെങ്കിലും അന്വേഷന സംഘം അത് മുഖവിലയ്ക്കെടുത്തിട്ടില്ല. ഇത്രയും വലിയ തുക വക്കീല്ഫീസായി വാങ്ങാന് മാത്രം പ്രമുഖ അഭിഭാഷകയാണോ ലാലി വിന്സെന്റ് എന്നത് അന്വേഷണസംഘത്തിന്റെ മുന്നിലുള്ള ചോദ്യമാണ്. ലാലി വിന്സെന്റിന്റെ മുന്കൂര് ജാമ്യഹർജി പരിഗണിക്കുന്നതിനിടെ ഹൈക്കോടതിയും ഇത്രയും വലിയതുക ഫീസായി വാങ്ങിയതില് സംശയം ഉന്നയിച്ചിരുന്നു. സ്കൂട്ടര് തട്ടിപ്പില് കണ്ണൂര് ടൗണ് പോലീസ് രജിസ്റ്റർ ചെയ്ത കേസില് ഏഴാം പ്രതിയാണ് കോണ്ഗ്രസ് നേതാവും അഭിഭാഷകയുമായ ലാലി വിന്സെന്റ്.
