തിരുവനന്തപുരം : നെയ്യാറ്റിന്കരയിലെ ഗോപന് സ്വാമിയുടെ മൃതദേഹം പോസ്റ്റുമോര്ട്ടത്തിനുശേഷം കുടുംബം ഏറ്റുവാങ്ങി. ഇന്ന് രാത്രി നെയ്യാറ്റിന്കരയിലെ സ്വകാര്യ ആശുപത്രി മോര്ച്ചറിയില് സൂക്ഷിക്കുന്ന മൃതദേഹം വെള്ളിയാഴ്ച സംസ്കരിക്കും. വിപുലമായ ചടങ്ങുകളോടെ മഹാസമാധിയായാണ് ഗോപന് സ്വാമിയുടെ മൃതദേഹം സംസ്കരിക്കുകയെന്ന് കുടുംബം അറിയിച്ചു.
ദുരൂഹതകൾ സംശയിച്ചിരുന്നെങ്കിലും മരണത്തില് അസ്വാഭാവികതയില്ലെന്നാണ് പ്രാഥമിക നിഗമനം. മരണകാരണമായേക്കാവുന്ന മുറിവുകളോ പരിക്കുകളോ മൃതദേഹത്തില് പ്രത്യക്ഷത്തില് കാണാനില്ലെന്നാണ് പൊലീസിന്റെ ഇന്ക്വസ്റ്റ് റിപ്പോര്ട്ട്. വിശദമായ പോസ്റ്റ്മോര്ട്ടം റിപ്പോര്ട്ട് ലഭിച്ചാലേ മരണകാരണം സംബന്ധിച്ചും മറ്റുവിവരങ്ങളിലും വ്യക്തത വരികയുള്ളൂ. ആന്തരികാവയവങ്ങളുടെ സാമ്പിളുകള് രാസപരിശോധനയ്ക്കും അയക്കും. ഇതിന്റെ പരിശോധനാഫലം ലഭിക്കാന് ഒരാഴ്ചയോളം സമയമെടുക്കും.
വ്യാഴാഴ്ച രാവിലെയാണ് ഗോപന് സ്വാമിയെ അടക്കം ചെയ്ത കല്ലറ പോലീസ് തുറന്നത്. ഗോപന് സ്വാമിയെ സമാധിയിരുത്തിയതാണ് എന്നാണ് കുടുംബം പറഞ്ഞിരുന്നത്. സബ് കളക്ടര് ഉള്പ്പെടെയുള്ളവരുടെ സാന്നിധ്യത്തില് രാവിലെ ഏഴുമണിയോടെ കല്ലറയുടെ സ്ലാബ് പൊളിച്ചപ്പോള് ഇരിക്കുന്ന നിലയില് ഗോപന് സ്വാമിയുടെ മൃതദേഹം കണ്ടെത്തുകയായിരുന്നു.
പോസ്റ്റുമോര്ട്ടം പൂര്ത്തിയായ ഉടന് മൃതദേഹം കുടുംബത്തിന് വിട്ടുനല്കാന് അധികൃതര് തീരുമാനിച്ചിരുന്നു. എന്നാല് മൃതദേഹം ഏറ്റുവാങ്ങില്ല എന്നായിരുന്നു കുടുംബത്തിന്റെ ആദ്യനിലപാട്. പിന്നീട് പോലീസും ജില്ലാ ഭരണകൂടങ്ങളും കുടുംബത്തെ കാര്യങ്ങള് പറഞ്ഞുമനസിലാക്കി. ഇതേത്തുടര്ന്നാണ് കുടുംബം മൃതദേഹം ഏറ്റുവാങ്ങിയത്.
സ്വകാര്യ ആശുപത്രിയിലെ മോര്ച്ചറിയില് നിന്ന് വെള്ളിയാഴ്ച രാവിലെ മൃതദേഹം വീട്ടിലേക്ക് കൊണ്ടുപോകും. തുടര്ന്ന് നേരത്തേ സമാധിയിരുത്തിയ അതേ കല്ലറയില് തന്നെ ഗോപന് സ്വാമിയുടെ മൃതദേഹം സമാധിയിരുത്താനാണ് കുടുംബത്തിന്റെ തീരുമാനം. തങ്ങളെ വേട്ടയാടുകയായിരുന്നുവെന്നാണ് ഗോപന് സ്വാമിയുടെ കുടുംബം ആരോപിക്കുന്നത്. ഇതിനെതിരെ നിയമനടപടി സ്വീകരിക്കാനും കുടുംബം ആലോചിക്കുന്നുണ്ട്.
