കോഴിക്കോട് : തദ്ദേശ തെരഞ്ഞെടുപ്പിനുള്ള സ്ഥാനാത്ഥി നിർണ്ണയവുമായി ബന്ധപ്പെട്ട് കോഴിക്കോട്ടെ കോണ്ഗ്രസില് പൊട്ടിത്തെറി. കോര്പ്പറേഷനില് സ്ഥാനാര്ത്ഥിയാക്കാത്തതില് പ്രതിഷേധിച്ച് കൗണ്സിലര് രാജിവെച്ചു. ചാലപ്പുറം വാര്ഡ് സിഎംപിക്ക് നല്കിയതില് പ്രതിഷേധിച്ച് മണ്ഡലം പ്രസിഡണ്ടും രാജിവെച്ചു.
കോഴിക്കോട് കോര്പ്പറേഷനിലെ 76 വാര്ഡുകളില് 49 ഇടത്താണ് കോണ്ഗ്രസ് മത്സരിക്കുന്നത്. സീറ്റ് ചര്ച്ചകള് പുരോഗമിക്കുന്നതിനിടയാണ് നടക്കാവ് കൗണ്സിലര് അല്ഫോന്സ രാജിവെച്ച് പാർട്ടി വിട്ടത്. തുടർന്ന് അല്ഫോന്സ ആം ആദ്മി പാര്ട്ടിയില് ചേര്ന്നു. ആം ആദ്മി പാര്ട്ടിയുടെ മാവൂര് റോഡ് വാര്ഡിലെ സ്ഥാനാര്ത്ഥിയായി മത്സരിക്കുമെന്നാണ് റിപ്പോർട്ട്.
വര്ഷങ്ങളായി കോണ്ഗ്രസിന്റെ കൈവശമുള്ള ചാലപ്പുറം വാര്ഡ് ഇത്തവണ സിഎംപി നൽകിയതിൽ പ്രതിഷേധിച്ചാണ് ചാലപ്പുറം മണ്ഡലം പ്രസിഡണ്ട് എം അയൂബിൻ്റെ രാജി. അയൂബ് ഡിസിസി പ്രസിഡണ്ടിന് രാജിക്കത്ത് കൈമാറി. കൂടുതൽ പേർ ഇനിയും കോൺഗ്രസ് വിടുമെന്ന് അയൂബ് പറഞ്ഞു.
