നിലമ്പൂർ: നിലമ്പൂർ ഫോറസ്റ്റ് ഓഫീസ് തകർത്ത സംഭവത്തില് അറസ്റ്റ് ചെയ്യപ്പെട്ട പി വി അൻവർ എംഎൽഎയ്ക്ക് ജാമ്യം അനുവദിച്ച് നിലമ്പൂർ കോടതി. നിലമ്പൂർ ഒന്നാം ക്ലാസ് മജിസ്ട്രേറ്റ് കോടതിയാണ് ജാമ്യം അനുവദിച്ചത്. വിധി സ്വാഗതാര്ഹമെന്നും ഇന്ന് തന്നെ ജയിലില് നിന്നിറക്കാന് ശ്രമം നടത്തുകയാണെന്നും അന്വറിന്റെ സഹോദരന് മുഹമ്മദ് റാഫി പറഞ്ഞു. .
കസ്റ്റഡി ആവശ്യം പൊലീസ് തള്ളിക്കളയുകയായിരുന്നു. ഉപാധികളോടെയാണ് ജാമ്യം. ജാമ്യത്തിനായി 50000 രൂപ വീതം ഓരോരുത്തരും കെട്ടിവെയ്ക്കണം. പൊതുമുതല് നശിപ്പിച്ചതിന് 35000 രൂപ വീതം വേറെയും കെട്ടിവെയ്ക്കണം എല്ലാ ബുധനാഴ്ചയും അന്വേഷണ ഉദ്യോഗസ്ഥന് മുന്നില് ഹാജരാകണം, എന്നിങ്ങനെയൊണ് ഉപാധികള്.
അൻവറിന്റെ ഒതായിയിലെ വീട്ടിലെത്തി ഇന്നലെ രാത്രിയാണ് നിലമ്പൂർ സിഐ സുനിൽ പള്ളിക്കലിന്റെ നേതൃത്വത്തിലുള്ള പോലീസ് സംഘം പി വി അൻവറിനെ അറസ്റ്റ് ചെയ്തത്. അൻവർ ഉൾപ്പടെ 11 ഓളം പേർക്കെതിരെയാണ് പൊലീസ് കേസെടുത്തിട്ടുള്ളത്. കൃത്യനിർവ്വഹണം തടസ്സപ്പെടുത്തൽ, പൊതു മുതൽ നശിപ്പിക്കൽ അടക്കമുള്ള വകുപ്പുകൾ പ്രകാരമാണ് കേസ് റജിസ്റ്റർ ചെയ്തിട്ടുള്ളത്.
