ഇംഫാൽ : മണിപ്പൂരിലെ നിരവധി ജില്ലകളിൽ വെള്ളിയാഴ്ച ഇന്ത്യൻ സുരക്ഷാ സേന ഒരുക്കിയ സംയുക്ത ഓപ്പറേഷനിൽ ആയുധങ്ങൾ, സ്ഫോടകവസ്തുക്കൾ, മറ്റ് സൈനിക ഉപകരണങ്ങൾ എന്നിവ കണ്ടെടുത്തു. മണിപ്പൂർ പോലീസ്, സെൻട്രൽ റിസർവ് പോലീസ് ഫോഴ്സ്, ബോർഡർ സെക്യൂരിറ്റി ഫോഴ്സ്, ഇന്തോ-ടിബറ്റൻ ബോർഡർ പോലീസ് എന്നിവയുമായി ഏകോപിപ്പിച്ച് ഇന്ത്യൻ ആർമിയും അസം റൈഫിൾസും ചേർന്നാണ് ഓപ്പറേഷൻ നടത്തിയത്. റൈഫിളുകൾ, കാർബൈനുകൾ, പിസ്റ്റളുകൾ എന്നിവയുൾപ്പെടെ 114 ആയുധങ്ങളും ഗ്രനേഡുകൾ, ഇംപ്രൊവൈസ്ഡ് സ്ഫോടകവസ്തുക്കൾ, മറ്റ് സൈനിക സാമഗ്രികൾ എന്നിവയും സുരക്ഷാ സേന കണ്ടെടുത്തു. കാങ്പോക്പി ജില്ലയിലെ ബങ്കറുകളും നശിപ്പിക്കപ്പെട്ടു.
ബിഷ്ണുപൂർ ജില്ലയിൽ നിന്ന് സുരക്ഷാ സേന രണ്ട് കാർബൈനുകൾ, രണ്ട് പിസ്റ്റളുകൾ, രണ്ട് റൈഫിളുകൾ, ഒരു ഇംപ്രൊവൈസ്ഡ് മോർട്ടാർ എന്നിവയുൾപ്പെടെ ഏഴ് ആയുധങ്ങൾ കണ്ടെടുത്തു. ചന്ദേൽ ജില്ലയിൽ നടത്തിയ തിരച്ചിലിൽ 12 ബോർ സിംഗിൾ ബാരൽ റൈഫിളുകൾ, മസിൽ-ലോഡഡ് റൈഫിളുകൾ, ഒരു ഇംപ്രൊവൈസ്ഡ് ഷോട്ട്ഗൺ, 32 ഇംപ്രൊവൈസ്ഡ് മോർട്ടാറുകൾ, നാല് സ്ഫോടകവസ്തുക്കൾ എന്നിവയുൾപ്പെടെ 55 ആയുധങ്ങൾ കണ്ടെടുത്തു.
സേനാപതി ജില്ലയിലെ തഫൗ കുക്കിയിൽ അസം റൈഫിൾസും മണിപ്പൂർ പോലീസും നടത്തിയ തിരച്ചിലിൽ സിംഗിൾ ബാരൽ, ഡബിൾ ബാരൽ തോക്കുകൾ ഉൾപ്പെടെ നാല് ആയുധങ്ങൾ കണ്ടെടുത്തു. ചുരാചന്ദ്പൂർ ജില്ലയിലെ ഗോത്തോളിൽ സുരക്ഷാ സേന 15 ആയുധങ്ങൾ കണ്ടെടുത്തു. ജിരിബാം ജില്ലയിലെ അൻഖാസു ഗ്രാമത്തിൽ നിന്ന് സുരക്ഷാ സേന ഒമ്പത് മോർട്ടാറുകൾ കണ്ടെടുത്തു. ഇംഫാൽ ഈസ്റ്റിലെ പൗരാബി, സാവോംബംഗ്, കലിക എന്നിവിടങ്ങളിൽ നടത്തിയ ഓപ്പറേഷനുകളിൽ ആറ് ആയുധങ്ങൾ കണ്ടെടുത്തു. കാങ്പോക്പി ജില്ലയിലെ ഖെൻഗാങ് ഗ്രാമത്തിൽ നടത്തിയ തിരച്ചിലിൽ നാല് ആയുധങ്ങൾ കണ്ടെടുക്കാനും 12 ബങ്കറുകൾ നശിപ്പിക്കാനും കഴിഞ്ഞു.
തൗബാൽ ജില്ലയിൽ, ലാങ്മെയ്തെക് യെറം ചിംഗിലും ലങ്കാത്തേലിലും അസം റൈഫിൾസും മണിപ്പൂർ പോലീസും എട്ട് ആയുധങ്ങൾ കണ്ടെടുത്തു. ഇംഫാൽ വെസ്റ്റിലെ മൊയ്ദാങ്പോക്ക് ഖുള്ളനിൽ സുരക്ഷാ സേന ആറ് ആയുധങ്ങൾ കണ്ടെടുത്തു. പ്രത്യേക രഹസ്യാന്വേഷണ വിവരങ്ങളുടെ അടിസ്ഥാനത്തിലാണ് ഇപ്പോൾ ഓപ്പറേഷനുകൾ നടത്തിയതെന്ന് അധികൃതർ പറഞ്ഞു.
