പത്തനംതിട്ട : ശബരിമല ദർശനത്തിന് സ്പോട്ട് ബുക്കിങ് സൗകര്യം കൂടി ഏർപ്പെടുത്താൻ സാദ്ധ്യത. തിരുവിതാംകൂർ ദേവസ്വം ബോർഡ് ഇക്കാര്യത്തിൽ പുനഃപരിശോധന നടത്തിയേക്കും.
സ്പോട്ട് ബുക്കിങ് ഒഴിവാക്കി വെർച്വൽ ക്യൂ മാത്രമാക്കിയതിൻ്റെ പേരിൽ സംഘപരിവാർ സംഘടനകൾ സമരത്തിനൊരുങ്ങുമെന്ന ഇന്റലിജൻസ് റിപ്പോർട്ടും പുതിയ തീരുമാനമെടുക്കാൻ സർക്കാറിനെ പ്രേരിപ്പിച്ചേക്കും. പ്രതിസന്ധി ഒഴിവാക്കാൻ പമ്പ, നിലയ്ക്കൽ, എരുമേലി എന്നിവിടങ്ങളിൽ സ്പോട്ട് ബുക്കിങ് പോലെ സൗകര്യം ഒരുക്കിയില്ലെങ്കിൽ പ്രതിഷേധത്തിന് കളമൊരുങ്ങുമെന്നാണ് റിപ്പോർട്ടിൽ മുന്നറിയിപ്പ് നൽകുന്നത്.
ഓൺലൈൻ ബുക്കിങ് മാത്രം മതിയെന്ന തീരുമാനം ഭക്തരെ ശബരിമലയിൽ നിന്ന് അകറ്റാനാണ് എന്ന പ്രചാരണം ബിജെപി ഇപ്പോഴെ ഉയർത്തുന്നുണ്ട്.
ശബരിമല ദർശനത്തിന് സ്പോട്ട് ബുക്കിങ് പുനരാരംഭിക്കാത്തതിൽ പ്രതിഷേധവുമായി ബിജെപിക്ക് പിന്നാലെ കോൺഗ്രസും രംഗത്തെത്തി. മുഴുവൻ ഭക്തർക്കും ദർശനം ഉറപ്പാക്കേണ്ട ചുമതലയിൽനിന്നാണ് സർക്കാരും ദേവസ്വവും ഒഴിഞ്ഞുമാറുന്നതെന്ന് പ്രതിപക്ഷനേതാവ് വി.ഡി.സതീശൻ കുറ്റപ്പെടുത്തി. സർക്കാരും ദേവസ്വം ബോർഡും വാശി ഉപേക്ഷിക്കണമെന്ന് രമേശ് ചെന്നിത്തലയും ആവശ്യപ്പെട്ടു.
ശബരിമല ദർശനത്തിൻ്റെ പേരിൽ ബിജെപി മുതലെടുപ്പ് നടത്താൻ അവസരം നൽകരുതെന്ന് സിപിഐയും ആവശ്യപ്പെട്ടിട്ടുണ്ട്. ബിജെപിക്ക് രാഷ്ട്രീയ മുതലെടുപ്പിനുള്ള അവസരം ഒരുക്കാതിരിക്കാൻ ശബരിമലയിൽ സ്പോട്ട് ബുക്കിംഗ് കൂടി വേണമെന്ന് ബിനോയ് വിശ്വം പറഞ്ഞു.
സര്ക്കാര് തീരുമാനത്തിൽ മാറ്റം വേണമെന്ന് സിപിഎം പത്തനംതിട്ട ജില്ലാ കമ്മിറ്റിയും ആവശ്യപ്പെട്ടു. ഓണ്ലൈന് ബുക്കിങ് ഇല്ലാതെ ശബരിമലയിലേക്ക് പോകുമെന്നും തടഞ്ഞാൽ പ്രതിഷേധിക്കുമെന്നുമാണ് ബിജെപിയുടെ മുന്നറിയിപ്പ്. ഇളവിൽ മുഖ്യമന്ത്രി അന്തിമ തീരുമാനമെടുക്കട്ടെയെന്നാണ് ദേവസ്വം ബോർഡ് നിലപാട്. സ്പോട്ട് ബുക്കിങ്ങോ അല്ലെങ്കിൽ പകരം സംവിധാനമോ വേണമെന്ന കാര്യത്തിൽ ബോർഡിനും രണ്ടഭിപ്രായമില്ല. ഇന്റലിജൻസ് റിപ്പോർട്ട് കൂടി മുഖവിലക്കെടുത്ത് സർക്കാർ സ്പോട്ട് ബുക്കിംഗിനു കൂടി സൗകര്യമൊരുക്കാനാണ് സാദ്ധ്യത.
