തിരുവനന്തപുരം: കേരളത്തിലും കോവിഡ് വ്യാപനത്തിന് സാദ്ധ്യതയുള്ളതിനാല് ജാഗ്രത പാലിക്കണമെന്ന് ആരോഗ്യ വകുപ്പ് മന്ത്രി വീണാ ജോര്ജ്. ദക്ഷിണ പൂര്വേഷ്യന് രാജ്യങ്ങളിൽ കോവിഡ് കേസുകള് വലിയ തോതില് റിപ്പോര്ട്ട് ചെയ്യുന്നതിന്റെ പശ്ചാത്തലത്തിലാണ് നിർദ്ദേശം. ജലദോഷം, തൊണ്ടവേദന, ചുമ, ശ്വാസതടസം തുടങ്ങിയ രോഗലക്ഷണങ്ങള് ഉള്ളവർ നിര്ബന്ധമായും മാസ്ക് ധരിക്കണമെന്നും മന്ത്രി അറിയിച്ചു.
ഇവിടങ്ങളിൽ പകരുന്ന ഒമിക്രോണ് ജെഎന് 1 വകഭേദങ്ങളായ എല്എഫ് 7, എന്ബി 1.8 എന്നിവയ്ക്ക് രോഗ വ്യാപന ശേഷി കൂടുതലാണ്. എന്നാല് തീവ്രത കൂടുതലല്ല. സ്വയം പ്രതിരോധം പ്രധാനമാണ്. പ്രായമായവരും, ഗര്ഭിണികളും, ഗുരുതര രോഗമുള്ളവരും പൊതുയിടങ്ങളിലും യാത്രകളിലും മാസ്ക് ധരിക്കുന്നത് അഭികാമ്യമാണ്. ആശുപത്രികളില് മാസ്ക് നിർബ്ബന്ധമാണ്.
ആരോഗ്യ പ്രവര്ത്തകര് മാസ്ക് നിര്ബന്ധമാക്കണം. അനാവശ്യ ആശുപത്രി സന്ദര്ശനം ഒഴിവാക്കണം. ഇടയ്ക്കിടയ്ക്ക് സോപ്പ് ഉപയോഗിച്ച് കൈ കഴുകുന്നത് നല്ലത്. എവിടെയാണോ ചികിത്സിക്കുന്നത് ആ ആശുപത്രിയില് തന്നെ പ്രോട്ടോകോള് പാലിച്ച് ചികിത്സ ഉറപ്പാക്കണം. ചില സ്വകാര്യ ആശുപത്രികള് കോവിഡ് ആണെന്ന് കാണുമ്പോള് റെഫര് ചെയ്യുന്നത് ശരിയല്ലെന്നും മന്ത്രി വ്യക്തമാക്കി.
സ്റ്റേറ്റ് ലെവല് റാപ്പിഡ് റെസ്പോണ്സ് ടീം (ആര്ആര്ടി) യോഗം ചേര്ന്ന് സംസ്ഥാനത്തെ പൊതു സാഹചര്യം വിലയിരുത്തി. 182 കോവിഡ് കേസുകളാണ് മേയ് മാസത്തില് സംസ്ഥാനത്ത് റിപ്പോര്ട്ട് ചെയ്തിട്ടുള്ളത്. കോട്ടയം ജില്ലയില് 57 കേസുകളും എറണാകുളത്ത് 34 കേസുകളും തിരുവനന്തപുരത്ത് 30 കേസുകളും റിപ്പോര്ട്ട് ചെയ്തിട്ടുണ്ട്. സംസ്ഥാനത്ത് രോഗലക്ഷണമുള്ളവര്ക്ക് കോവിഡ് പരിശോധന നടത്താന് നിര്ദ്ദേശം നല്കിയിട്ടുണ്ട്. ആര്ടിപിസിആര് കിറ്റുകളും മറ്റ് സുരക്ഷാ ഉപകരണങ്ങളും ഉറപ്പാക്കാനും നിര്ദ്ദേശം നല്കി.
നിപ പ്രതിരോധ പ്രവര്ത്തനം പ്രത്യേകമായി യോഗം ചര്ച്ച ചെയ്തു. പ്രോട്ടോകോള് പാലിച്ച് കണ്ട്രോള് റൂം പ്രവര്ത്തനങ്ങള് തുടരാന് നിര്ദേശം നല്കി. രോഗവ്യാപനം ഇല്ലാത്തതിനാലും കണ്ടൈന്മെന്റ് സോണ് പിന്വലിക്കാവുന്നതാണെന്ന് യോഗം വിലയിരുത്തി.
