മലപ്പുറം : പെരിന്തല്മണ്ണയ്ക്ക് സമീപം കുരുവമ്പലത്ത് നിന്നും കാണാതായ വിദ്യാര്ത്ഥിയെ തിരുവനന്തപുരത്ത് മരിച്ച നിലയില് കണ്ടെത്തി. കുരുവമ്പലം പൊട്ടിപ്പാറ ഹൗസിലെ ബഷീറിന്റെ മകന് മുഹമ്മദ് സിനാനെന്റെ (19) മൃതദേഹം കത്തിക്കരിഞ്ഞ നിലയിലാണ് കണ്ടെത്തിയത്. തിരുവനന്തപുരം മ്യൂസിയം പോലീസ് സ്റ്റേഷന് പരിധിയിലെ റസിഡന്ഷ്യല് ഏരിയയിലെ വിജനമായ സ്ഥലത്താണ് മൃതദേഹം കണ്ടത്.
ചൊവ്വാഴ്ച രാവിലെയാണ് കുരുവമ്പലത്തുനിന്ന് മുഹമ്മദ് സിനാനെ കാണാതായത്. ചൊവ്വാഴ്ച മലപ്പുറത്തെ മഅ്ദിന് കോളജിലേക്ക് പോയതായിരുന്നു. മകനെ കാണാനില്ലെന്ന് കാണിച്ച് പിതാവ് കൊളത്തൂര് പോലീസില് പരാതിപ്പെട്ടിരുന്നു. അന്വേഷണം പുരോഗമിക്കവെയാണ് തിരുവനന്തപുരത്ത് മരിച്ചനിലയിൽ കണ്ടെത്തിയതായി കൊളത്തൂര് പോലീസിന് വിവരം ലഭിച്ചത്. സിസിടിവി കേന്ദ്രീകരിച്ച് നടത്തിയ പരിശോധനയില് കുപ്പിയില് പെട്രോള് പോലുള്ള ദ്രാവകവുമായി സിനാന് നടന്നു പോകുന്ന ദൃശ്യങ്ങള് ലഭിച്ചിട്ടുണ്ട്. വിവരമറിഞ്ഞ് ബന്ധുക്കള് തിരുവനന്തപുരത്തേക്ക് തിരിച്ചു.
