തിരുവനന്തപുരം: ദുരന്തബാധിത ചൂരല്മലയില് നഷ്ടമായ വീടുകള്ക്ക് പകരമായി പുതിയ വീടുകള് നിര്മ്മിച്ചു നല്കാന് ധാരാളം പേര് മുന്നോട്ടുവന്നതായി മുഖ്യമന്ത്രി പിണറായി വിജയൻ. ലോക്സഭാ പ്രതിപക്ഷ നേതാവ് രാഹുല് ഗാന്ധി 100 വീടുകള് നിര്മിച്ചു നല്കുമെന്ന് പ്രതിപക്ഷ നേതാവ് വിഡി സതീശന് അറിയിച്ചിട്ടുണ്ട്. വിഡി സതീശന് നേരിട്ട് ചുമതല വഹിക്കുന്ന 25 വീടുകളും ഇതില് ഉള്പ്പെടും. കര്ണാടക മുഖ്യമന്ത്രി സിദ്ധരാമയ്യ 100 വീടുകള് നിര്മ്മിച്ചു നല്കുമെന്ന് അറിയിച്ചിട്ടുണ്ട്. അദ്ദേഹത്തെ നേരിട്ട് വിളിച്ച് നന്ദി അറിയിച്ചു.
ശോഭ റിയാലിറ്റി ഗ്രൂപ്പ് 50 വീടുകള് നിര്മ്മിച്ചു നല്കാമെന്ന് അറിയിച്ചിട്ടുണ്ട്. കോഴിക്കോട് കേന്ദ്രീകരിച്ചുള്ള വ്യവസായികളുടെ കൂട്ടായ്മയായ ബിസിനസ് ക്ലബ് 50 വീടുകള് നിര്മ്മിച്ചു നല്കാമെന്ന് വാഗ്ദാനം നല്കിയിട്ടുണ്ട്.
ഉന്നത വിദ്യാഭ്യാസ വകുപ്പിന് കീഴിലുള്ള നാഷണല് സര്വ്വീസ് സ്കീം (എന്എസ്എസ്) ദുരിത ബാധിത കുടുംബങ്ങള്ക്കായി 150 ഭവനങ്ങള് നിര്മ്മിച്ചു നല്കുകയോ അല്ലെങ്കില് അതിന്റെ തുക സര്ക്കാര് നല്കുന്നതിനോ സന്നദ്ധമാണെന്ന് അറിയിച്ചിട്ടുണ്ട്. വേള്ഡ് മലയാളി കൗണ്സില് 14 വീടുകള് നിര്മ്മിച്ചു നല്കും.
